Dhjetra refugjatë Rohingya në Mbretërinë e Bashkuar dhe SHBA kanë paditur Facebook, duke akuzuar gjigantin e mediave sociale se ka lejuar përhapjen e gjuhës së urrejtjes kundër tyre.

Ata po kërkojnë më shumë se 150 miliardë dollarë kompensim, duke pretenduar se platformat e Facebook promovojnë dhunën kundër pakicës së persekutuar, transmeton portal arbresh.info
Rreth 10 mijë myslimanë Rohingya u vranë gjatë një goditje ushtarake në Mianmar gjatë vitit 2017.

Facebook, tani i quajtur Meta, nuk iu përgjigj menjëherë akuzave.

Kompania akuzohet se ka lejuar që “përhapja e dezinformatave të urryera dhe të rrezikshme të vazhdojë për vite me radhë”.

Facebook ka më shumë se 20 milionë përdorues në Mianmar. Për më shumë, kjo platformë e mediave sociale është mënyra e tyre kryesore ose e vetme për të marrë dhe ndarë lajmet.

Facebook pranoi në vitin 2018 se nuk kishte bërë mjaftueshëm për të parandaluar nxitjen e dhunës dhe gjuhën e urrejtjes kundër Rohingya-ve.

Rohingya shihen si emigrantë të paligjshëm në Mianmar dhe janë diskriminuar nga qeveria dhe publiku për dekada.

Në vitin 2017, ushtria e Mianmarit filloi një goditje të dhunshme në shtetin Rakhine pasi militantët Rohingya kryen sulme vdekjeprurëse në postet e policisë.

Mijëra njerëz vdiqën dhe më shumë se 700,000 Rohingya u larguan në Bangladeshin fqinj. Ekzistojnë gjithashtu akuza të përhapura për shkelje të të drejtave të njeriut, duke përfshirë vrasje arbitrare, përdhunime dhe djegie të tokës, transmeton portal arbresh.info

Në vitin 2018, OKB-ja akuzoi Facebook-un se ishte “i ngadalshëm dhe joefektiv” në përgjigjen e tij ndaj përhapjes së urrejtjes në internet.

Sipas ligjit amerikan, Facebook mbrohet kryesisht nga përgjegjësia për përmbajtjen e postuar nga përdoruesit e tij. Por padia e re argumenton se ligji i Mianmarit – i cili nuk ka mbrojtje të tilla – duhet të mbizotërojë në këtë rast./bbc/arbresh.info/