Komandanti Suprem i Forcave të Armatosura të Ukrainës, Oleksandr Syrskyi, ka dhënë detaje të reja rreth aksioneve të ushtarëve ukrainas në rajonin e Kurskut.

Sipas tij, forcat ukrainase tani kontrollojnë një sipërfaqe edhe më të madhe duke përfshirë 93 vendbanime në këtë rajon strategjik.

Ai nënvizoi rëndësinë e krijimit të një zone sigurie për të mbrojtur rajonin Sumy nga sulmet që mund të vijnë prej Federatës Ruse, raporton ukrainepravda.

Ai shpjegoi se ky hap është thelbësor për të ndaluar sulmet mbi objektet civile dhe për të shtypur forcat armike që veprojnë në atë zonë.

Duke përshkruar më tej operacionet, Sirsky bëri të ditur se forcat e armatosura ukrainase kanë arritur të avancojnë me sukses nga 28 deri në 35 kilometra brenda territorit rus, duke pushtuar një sipërfaqe prej 1,263 kilometrash katrorë.

Ai theksoi se kjo përparim ka rezultuar në vendosjen e kontrollit të plotë mbi 93 vendbanime në rajonin e Kurskut, çka përbën një fitore të rëndësishme strategjike për Ukrainën.

Kjo deklaratë tregon përparimin e vazhdueshëm të forcave ukrainase në përpjekjet e tyre për të siguruar mbrojtjen e territorit të tyre dhe për të kundërshtuar agresionin e vazhdueshëm të Rusisë. /Telegrafi/