Të paktën 46 emigrantë pa dokumente u gjetën të vdekur në një rimorkio traktor në San Antonio, Teksas dhe më shumë se njëzet u shtruan në spital, thanë autoritetet, transmeton arbresh.info.

Ekuipazhet ishin në bllokun 9600 të Quintana Road ku një makinë me 18 rrota që përmbante deri në 100 emigrantë brenda u gjet e braktisur, raportoi Fox San Antonio. Zbulimi është pjesë e asaj që besohet të jetë një operacion kontrabandë me njerëz.

“Kjo nuk është asgjë më pak se një tragjedi e tmerrshme njerëzore,” tha kryebashkiaku i San Antonios, Ron Nirenberg, të hënën mbrëma pranë vendndodhjes ku u gjet traktor-rimorkio, shkruan FoxNews.

Autoritetet në vendngjarje konfirmuan se 46 persona u gjetën të vdekur, asnjë prej të cilëve nuk ishte fëmijë. Zyrtarët nuk thanë nëse individët kishin emigruar nga Meksika apo diku tjetër.

“Gjendja e emigrantëve që kërkojnë strehim është gjithmonë një krizë humanitare, por sonte kemi të bëjmë me një tragjedi të tmerrshme njerëzore,” shtoi kryebashkiaku.

Nga traktori-rimorkio u transportuan në spital 16 persona, përfshirë 12 të rritur dhe katër fëmijë.

“Shpresojmë që përgjegjësit për vendosjen e këtyre njerëzve në kushte të tilla çnjerëzore të ndiqen penalisht në masën më të plotë të ligjit”, tha kryebashkiaku.

Shefi i Departamentit të Policisë së San Antonios, William McManus tha se një punëtor aty pranë njoftoi autoritetet për traktor-rimorkio pak para orës 18:00. Me të mbërritur në vendngjarje, zyrtarët gjetën dhjetëra të vdekur në pjesën e pasme të mjetit transportues.

“Ky është tani një hetim federal,” tha McManus. Shefi i policisë tha gjithashtu se të paktën tre persona ishin në paraburgim, por nuk specifikoi nëse individët ishin të dyshuar në hetim. /arbresh.info/