Duke reaguar ndaj dhënies së titullit “kalorës” nga mbretëresha britanike Elizabeth II për ish-kryeministrin britanik, Tony Blair, në kundërshtim me çmimin irakianët mendojnë se Blair duhet të gjykohet për shkak të përgjegjësisë së tij në pushtimin e Irakut.

Teksa numri i mbështetësve të peticionit të nisur për të anuluar titullin që i është dhënë Blairit në Britani kalon 1 milion, çështja është në rendin e ditës edhe në gjeografinë arabe.

Irakianët duan që Blair, i cili u kritikua për mbështetjen e tij ndaj pushtimit të udhëhequr nga SHBA-ja në vitin 2003, të gjykohet për krime lufte.

Duke folur për Anadolu Agency (AA), Jawdat Qazim nga Bagdadi tha se, “SHBA-ja dhe Britania marrin gjithmonë vendime që sfidojnë vullnetin e popullit. Ky vendim (titulli i kalorësit) është një sfidë ndaj ndjenjave të popujve të botës së tretë. Toni Blair është një kriminel lufte dhe duhet të gjykohet. Blair dhe George W. Bush ishin budallenj duke sulmuar Irakun. Si rezultat i këtyre sulmeve, populli irakian vuajti shumë për shkak të krizave që përjetoi”.

Duke thënë se bota perëndimore, në krye me SHBA-në dhe Britaninë, ka marrë vendime të tilla edhe më parë, Qazim kërkoi që titulli, të cilin e cilësoi si “gabim të madh”, të tërhiqet sa më parë.

“Populli i Irakut u dënua me fatkeqësi të tilla si uria, mjerimi, mungesa e shërbimit publik dhe shfuqizimi i ushtrisë për shkak të luftës në të cilën Blair ishte gjithashtu partner. Shpresojmë që vendimet dhe hapat e ndërmarra nga fuqitë e mëdha do të jenë në favor të së drejtës”, tha Qazim.

-“Blair shkatërroi Irakun”

Murtadha Muhammed, 26-vjeçari nga Maysani, tha se pushtimi i udhëhequr nga SHBA-ja, i mbështetur nga Blair, i shkaktoi një dëm të madh vendit të tij dhe sot ata po përballen me shkatërrim në vend.

“Blair ka shkatërruar Irakun dhe ai sigurisht nuk e meriton këtë çmim. I gjithë populli irakian ka një mendim negativ për Blairin”, tha ai.

– “Blair duhet të dalë në gjyq”

Deputeti kurd i Irakut, Musenna Emin, ishte ndër ata që reaguan ndaj dhënies së titullit “kalorës” ish-kryeministrit Blair.

“Tony Blair ishte një nga ata që vendosën të shkojnë në luftë kundër Irakut. Edhe pse kjo luftë u bë për të përmbysur një regjim diktatorial dhe të pamëshirshëm, ajo çoi në shumë krime si përdorimi i uraniumit kundër popullit”, tha Emin.

Emin tha se dhjetëra fëmijë vdiqën nga uria gjatë embargos ndaj Irakut në vitet 1990.

“Lufta kundër popullit me arsyetimin e shpëtimit të tij nga periudha e embargos dhe regjimi i Sadamit është vrasje e pastër dhe kjo dosje duhet të dëgjohet në gjykatat ndërkombëtare. Tony Blair nuk e meriton këtë titull pasi ai është partner në këtë krim dhe ai duhet të ndiqet penalisht sepse e tha me gojën e tij se vendimi për luftë kundër Irakut bazohej në gënjeshtra. Dhjetëra njerëz të pafajshëm u morën në shënjestër të padrejtë në këtë luftë”.

Emin theksoi se edhe pse plani për të shpëtuar Irakun nga regjimi i Sadamit ka qëllime të mira, ai duhet të kryhej pa gjakderdhje, pa shkatërruar infrastrukturën dhe me më pak dëme, por ndodhi e kundërta.

– “Blair mashtroi parlamentin britanik për armët e Irakut të shkatërrimit në masë”

Blair, i cili shërbeu si kryeministër i Mbretërisë së Bashkuar nga viti 1997 deri në 2007, është kritikuar për mbështetjen e tij për pushtimin e Irakut në vitin 2003 nga forcat e koalicionit të udhëhequr nga SHBA-ja.

Raporti Chilcot, i publikuar në vitin 2016, zbuloi se Blair e siguroi presidentin e atëhershëm të SHBA-së, George W. Bush, për mbështetje në negociatat private përpara se të merrte miratimin e parlamentit britanik.

Blair, i cili u zbulua se kishte mashtruar parlamentin britanik në lidhje me armët e Irakut të shkatërrimit në masë, e bëri vendin e tij partner në pushtimin e Irakut duke dërguar 30.000 ushtarë.

Në pushtimin e Irakut i cili filloi më 20 mars 2003 vlerësohet se humbën jetën më shumë se 200.000 irakianë dhe 179 ushtarë britanikë.