Një burrë i dyshuar për tentim për ta vrarë ish-presidentin amerikan, Donald Trump, është ngarkuar me dy vepra penale për shkeljen e ligjit për armët nga një gjykatë federale të hënën, një ditë pasi ai u vërejt me pushkë në dorë i fshehur në shkurre në fushën e golfit të Trumpit në Floridë.
Ai pritet të përballet me akuza të tjera, por dy akuzat fillestare – posedimi i armës zjarrit si një i dënuar me burgim dhe posedimi i armës së zjarrit me numër të fshirë serik – do t’ua mundësojë autoriteteve ta mbajnë atë në paraburgim gjatë vazhdimit të hetimeve.
Trump, kandidati i republikanëve për zgjedhjet presidenciale të 5 nëntorit, shpëtoi pa u dëmtuar. Por, ky incident, i cili ndodhi vetëm nëntë javë pasi Trumpi i mbijetoi një atentati në Pensilvani, ka ngritur pyetje se si ka mundësi që një i dyshuar i armatosur ishte në gjendje të arrinte aq afër ish-presidentit.
Sipas autoriteteve, besohet se i dyshuari mund të ketë pritur i shtrirë në shkurre për gati 12 orë të dielën.
Shërbimi Sekret i SHBA-së hapi zjarr pasi një agjent i tij e pa tytën e një pushke duke dalë nga shkurret të dielën në fushën e golfit të Trumpit në Palm Beach, Floridë, vetëm disa qindra metra larg vendit ku ish-presidenti po luante golf.
I dyshuari iku nga vendi i ngjarjes duke përdorur një automjet të shërbimeve sportive. Oficerët gjetën në vendin e ngjarjes një pushkë të mbushur dhe me dylbi, një kamerë digjitale dhe një çantë plastike me ushqim.
Një i dyshuar, i identifikuar të hënën si Ryan Routh, 58 vjeç, u arrestua rreth 40 minuta më vonë derisa po voziste. I pyetur nga oficerët nëse e dinte pse e kishin ndalur, Routh ishte “përgjigjur se po”. Targat në veturën e tyre ishin raportuar në polici si të vjedhura nga një veturë tjetër.
Të dhënat tregojnë se një telefon i lidhur me Routhin ishte lokalizuar në fushën e golfit në orën 1:59 mëngjesin e së dielës.
Routh ka qenë dy herë i dënuar, në të dyja rastet në Karolinën e Veriut, sipas të dhënave. Më 2002, ai ishte dënuar për posedimin e një arme të shkatërrimit në masë dhe më 2010 ishte dënuar për posedimin e mallrave të vjedhura./rel
Barella: Sot kundër një skuadre shumë të fortë dëshmuam se m...
Kurti: Të përkushtuar për të vërtetën dhe për drejtësi për t...
Shpërthimet në Liban, reagon kryeministri izraelit Netanyahu
Raportohet për një lëvizje të mundshme të Zhegrovës në të ar...
Biden pret të hënën homologun e Emirateve të Bashkuara Arabe...
Finlanda e mbron vendimin për të blerë armë izraelite