Një numër refugjatësh ukrainas në Hungari kanë humbur strehimin falas që nga sot, pasi ky privilegj tani e tutje do t’u jepet vetëm atyre të zhvendosur nga zonat e luftës, të cilat janë përcaktuar nga qeveria e kryeministrit të vendit, Viktor Orban.

Pas dy vjet e gjysmë lufte, një ndryshim “logjik dhe proporcional” i ligjit ishte i nevojshëm, tha komisioneri përgjegjës për pritjen e ukrainasve, Norbert Pal, për gazetën pro-qeveritare Magyar Nemzet.

Hungaria aktualisht pret 46,000 refugjatë nga vendi fqinj. Shumica vijnë nga Ukraina perëndimore dhe shpesh vijnë nga pakica hungareze. Sipas UNHCR, ndryshimi i ligjit, i cili u miratua më 28 qershor, por hyri në fuqi sot, prek deri në 3000 persona.

Në Kocs, në veri të Budapestit, rreth 120 refugjatë – kryesisht gra rome dhe fëmijët e tyre – u dëbuan nga një qendër pritjeje, sipas një fotoreporteri të AFP.

“Ne jemi të dëshpëruar, sepse nuk kemi ku të shkojmë,” tha Marina Amit, një nënë e pesë fëmijëve që mbërriti në Hungari vitin e kaluar. “Ne nuk mund të kthehemi në Ukrainë, unë kam një djalë 17-vjeçar,” shtoi ajo, duke shpjeguar se ai ka frikë se do të dërgohet në front.

Sot, Budapesti përcakton 13 zona gjeografike të Ukrainës si zona lufte pra gjysmën e rajoneve të këtij vendi. UNHCR i kujtoi Hungarisë se duhet të respektojë ligjin evropian që u garanton refugjatëve akses në strehim./abcnews/