Ministri i Mbrojtjes së Holandës, Ruben Brekelman ka deklaruar se vendi i tij duhet të rrisë buxhetin e mbrojtjes për të ruajtur paqen dhe sigurinë në vend, pasi ka paralajmëruar se kërcënimi i një konflikti të armatosur në Evropë është real dhe në rritje.

Ministri holandez foli në prezantimin e memorandumit zyrtar të mbrojtjes në kazermat Bernhard në qytetin Amersfoort. Siç raporton transmetuesi publik NOS, komentet e tij erdhën në linjë me memorandumin që thoshte se “kërcënimi i konfliktit të armatosur në Evropë është real dhe në rritje, kryesisht për shkak të luftës në Ukrainë dhe tensioneve në rritje në Lindjen e Mesme”.

“Duket se jetojmë në paqe në Holandë, por në realitet nuk është më kështu. Ne jetojmë në një zonë gri, pa luftë, pa paqe. Ka sulme të vazhdueshme kibernetike dhe ne spiunohemi çdo ditë”, tha Brekelman.

Memorandumi i prezantuar gjithashtu sugjeron riaktivizimin e sistemit të rekrutimit pasi modeli aktual i bazuar vetëm në ushtarët profesionistë dhe rezervistët nuk do të ishte i mjaftueshëm përballë sfidave të sigurisë.

Sipas dokumentit, vendi do të shpenzojë 2.4 miliardë euro shtesë çdo vit për të blerë pajisje të reja për forcat e armatosura si dhe për të rritur numrin e ushtarëve dhe sigurinë kibernetike.

Rreth 50 tanke “Leopard 2A8”, gjashtë avionë të tjerë luftarakë “F-35”, dy fregata shtesë luftarake kundër nëndetëse, më shumë helikopterë detar si dhe një sasi të madhe municionesh të ndryshme janë ndër blerjet që do të realizohen.

Sipas transmetuesit holandez, në këtë mënyrë vendi do të përmbushë edhe kërkesën e NATO-s për të shpenzuar të paktën 2 për qind të prodhimit të brendshëm bruto për mbrojtjen.