Të paktën dy civilë u vranë dhe tre të tjerë u plagosën në rajonin jugor Herson të Ukrainës për shkak të bombardimeve të kryera nga Rusia, tha një zyrtar ukrainas.

Ndërkohë, ushtria ukrainase raportoi se luftimet për kontrollin e qytetit lindor të Bahmutit ende po vazhdojnë.

“Rusia shënjestroi lagjet e banimit të zonave të populluara nga civilët dhe objektivat e infrastrukturës në rrethin [Herson] Berislav”, shkroi kreu i administratës ushtarake rajonale në Herson, Oleksandr Prokudin, në Telegram.

Prokudin tha se forcat ruse kryen 64 granatime të territorit të kontrolluar nga qeveria ukrainase në Herson, duke përdorur artileri të rëndë, raketa, tanke dhe dronë.

Pasi Ukraina rimori pjesë të rajonit të Hersonit vjeshtën e kaluar, forcat ruse kanë granatuar rajonin dhe qytetin pothuajse çdo ditë.

Në Ukrainën lindore, lufta për kontrollin e Bahmutit dhe rrethinave të tij është ende në vazhdim, me mbrojtësit ukrainas që zmbrapsën 26 sulme nga forcat ruse gjatë 24 orëve të fundit, njoftoi Shtabi i Përgjithshëm i Ukrainës më 24 maj. Drejtimet kryesore të sulmit të Rusisë përqendrohen rreth linjës së frontit Bahmut-Avdivka-Marinka, e cila mbetet epiqendra e luftimeve në rajonin lindor të Ukrainës, Donjeck.

Forcat ruse kanë nisur gjithashtu sulme në Liman, në veri të Bahmutit dhe Kupiansk, në rajonin e Harkiv, tha ushtria në raportin e saj të përditshëm.

Si Rusia, ashtu edhe Ukraina, kanë pretenduar se po arrijnë sukses gjatë luftimeve në Bahmut.

Rusia pretendon se e ka qytetin nën kontrollin e saj pas një muaj luftimesh që besohet të kenë marrë mijëra viktima, por ushtria ukrainase thotë se ka përparuar në krahët verior dhe jugor të qytetit, duke synuar ta rrethojë atë.

Presidenti ukrainas Volodymyr Zelensky më 23 maj vizitoi trupat në vijën e frontit në Donjeck. Zelensky postoi foto të tij duke shpërndarë medalje për luftëtarët në një vend pranë qytetit të Vuhledar.

Ndërkohë, u raportua se luftimet rreth rajonit të Belgorodit të Rusisë një ditë pasi luftëtarët e armatosur që dyshohet se vinin nga brenda Ukrainës nisën një nga inkursionet më të mëdha ndërkufitare që nga fillimi i luftës.

Qeveria ukrainase ka mohuar çdo rol në këtë ngjarje.

Ministria ruse e Mbrojtjes më 23 maj pretendoi se trupat e saj kishin rrethuar luftëtarët e armikut dhe përdorën “sulme ajrore dhe veprime aktive nga njësitë kufitare” për të zmbrapsur forcat, duke vrarë shumë prej tyre.

Edhe pse Radio Evropa e Lirë nuk arriti të konfirmojë në mënyrë të pavarur pretendimet, Vyacheslav Gladkov, guvernatori i rajonit të Belgorodit, deklaroi se “masat kundër terrorizmit” të zbatuara më parë ishin hequr.

Dy grupe, Trupat Vullnetare Ruse dhe Legjioni i Lirisë së Rusisë, morën përgjegjësinë për infiltrimin në territorin rus. Ata thanë se ishin luftëtarë rusë kundër Kremlinit që kërkonin të rrëzonin presidentin Vladimir Putin./REL/