Gjykata Evropiane e të Drejtave të Njeriut (GJEDNJ) ka vendosur kundër Greqisë në një rast lidhur me fundosjen e një varke me emigrantë në vitin 2014 në Detin Egje, transmeton Anadolu Agency (AA).

Rasti ‘Safi dhe të tjerët kundër Greqisë’ kaloi në gjykatën evropiane në janar të vitit 2015, një vit pasi 11 nga 27 emigrantë u vranë kur varka e tyre u fundos në ujërat e Egjeut pranë ishullit Farmakonisi.

Rasti u paraqit nga një grup prej 16 aplikantësh, 13 afganë, dy sirianë dhe një shtetas palestinez.

Gjykata evropiane vendosi se ka pasur një “shkelje e nenit 2 (e drejta për jetën) të Konventës Evropiane për të Drejtat e Njeriut”.

“Gjykata konstatoi se ka pasur mangësi në procedurë dhe arriti në përfundim se autoritetet kombëtare nuk kanë kryer një hetim të plotë dhe efektiv që mund të hedh dritë mbi rrethanat në të cilat anija ishte fundosur”, tha gjykata.

Gjykata konstatoi se “autoritetet greke nuk kanë bërë gjithçka që mund të pritej prej tyre për t’u ofruar kërkuesve dhe të afërmve të tyre nivelin e mbrojtjes që kërkohet nga neni 2 i Konventës”.

Grupet e të drejtave të njeriut dhe mediat kryesore kanë raportuar shpesh për kthim mbrapa të paligjshme dhe shkelje të tjera të të drejtave të njeriut nga autoritetet greke.

Türkiye dhe grupet globale të të drejtave kanë dënuar në mënyrë të përsëritur praktikën e paligjshme të Greqisë, duke theksuar se ajo shkel vlerat humanitare dhe ligjin ndërkombëtar duke rrezikuar jetën e emigrantëve të cenueshëm, përfshirë gra dhe fëmijë.

GJEDNJ ka urdhëruar Greqinë të paguajë një total prej 330 mijë euro “në lidhje me dëmin jo-pasuror të pësuar nga kërkuesit”.