Militantët e Hamasit kanë lëshuar dhjetëra raketa në Izrael pasi sulmet ajrore izraelite vranë komandantë të vjetër dhe rrëzuan një ndërtesë shumëkatëshe në Gaza.

Raportet thonë se disa vende në Izraelin jugor u goditën, duke vrarë një fëmijë të vogël në Sderot, shkruan BBC, transmeton portali arbresh.info

Shkallëzimi i luftimeve, i cili filloi të hënën, ka bërë që OKB të deklarohet për një “luftë në shkallë të plotë”.

Të paktën 65 njerëz në Gaza, duke përfshirë 14 fëmijë, dhe shtatë njerëz në Izrael janë vrarë që nga ajo kohë.

Luftimet shpërthyen pas disa javësh të tensionit izraelito-palestinez në Jeruzalemin Lindor, i cili kulmoi me përplasjet në një vend të shenjtë të nderuar nga myslimanët dhe hebrenjtë.

Dhuna në disa qytete në Izrael me popullsi të përzier hebreje dhe arabe ka dërguar në qindra arrestime.

Policia izraelite tha të mërkurën në mbrëmje se oficerët po vepronin në dhjetra vende në të gjithë vendin dhe po merreshin me “trazira të dhunshme”. Kishte raporte në mediat izraelite për individë hebrenj dhe arabë që sulmoheshin nga turmat.

Kryeministri izraelit, Benjamin Netanyahu, tha se ajo që po ndodh në qytetet e Izraelit është e “papranueshme”.

“Asgjë nuk mund të justifikojë një turmë arabe që sulmon hebrenjtë dhe asgjë nuk mund të justifikojë një turmë hebre që sulmon arabët”, tha ai në një deklaratë me video, siç raportohet nga Times of Israel.

Militantët palestinezë kanë qëlluar me raketa në Izrael që nga e hëna në mbrëmje, dhe Izraeli është përgjigjur duke goditur objektiva në territor.

Qindra sulme ajrore dhe sulme me raketa janë kryer.

Sipas Ministrisë së Shëndetit në Gaza, më shumë se 360 njerëz janë plagosur./arbresh.info/