Zyrtarët e inteligjencës amerikane e njoftuan të martën ish-presidentin amerikan, Donald Trump, për kërcënimet e dyshuara nga Irani për ta vrarë atë, tha fushata e kandidatit republikan.

“Presidenti Trump u njoftua sot nga Zyra e Drejtorit të Inteligjencës Kombëtare në lidhje me kërcënimet e vërteta dhe specifike nga Irani për ta vrarë atë, në përpjekje për destabilizim dhe për të shkaktuar kaos në Shtetet e Bashkuara”, tha fushata e Trumpit në një komunikatë të martën.

Ajo tha se zyrtarët e inteligjencës kanë zbuluar se kërcënimet iraniane “janë rritur në muajt e fundit” dhe se zyrtarët e Qeverisë amerikane janë duke punuar për ta mbrojtur Trumpin dhe për t’u siguruar se zgjedhjet nuk do të ndikohen.

Trump tha më herët në faqen e vet Truth Social se Irani përbën “kërcënim të madh” për jetën e tij, duke shtuar se përpjekjet e Iranit ishin të pasuksesshme “por ata do të tentojnë përsëri”.

Irani e ka mohuar në të kaluarën çdo pretendim të SHBA-së se po ndërhyn në çështjet amerikane.

Autoritetet amerikane janë duke i hetuar ndaras një tentim për ta vrarë Trumpin në fushën e tij të golfit në Floridë në shtator, dhe një incident me të shtëna në tubimin e kandidatit republikan për president më 13 korrik në Pensilvani.

Nuk ka tregues se Irani ka qenë i përfshirë në ndonjërin prej këtyre incidenteve.

Byroja Federale e Hetimeve (FBI) dhe agjencitë e tjera federale të Shteteve të Bashkuara thanë javën e kaluar se hakerët iranianë u dërguan emaile të pakërkuara individëve të lidhur me fushatën e presidentit Joe Biden për zgjedhjet e nëntorit, të cilat përmbanin pjesë të të dhënave të vjedhura dhe jopublike të fushatës së Trumpit.

Ato thanë se kjo ishte një tjetër përpjekje e Teheranit për të ndikuar në zgjedhjet në SHBA.

Bideni ishte kandidat demokrat deri më 21 korrik, kur njoftoi se u tërhoq nga gara dhe e mbështeti Kamala Harrisin si zëvendësuese të tij, shkruan REL.

Në gusht, Shtetet e Bashkuara e akuzuan Iranin se kreu operacione kibernetike kundër fushatave të dy kandidatëve për president amerikan.

Irani i mohoi akuzat.