Franca ka shprehur mbështetjen për Gjykatën Penale Ndërkombëtare pasi kërkoi urdhër arrest për kryeministrin izraelit Benjamin Netanyahu, ministrin e tij të Mbrojtjes, Yoav Gallant si edhe udhëheqësit e Hamasit, dy liderët e lartë Mohammed Diab Ibrahim al-Masri dhe Ismail Haniyeh.

“Franca mbështet Gjykatën Ndërkombëtare Penale, pavarësinë e saj dhe luftën kundër mosndëshkimit në të gjitha situatat”, tha ministria e saj e jashtme në një deklaratë.

Mbështetja e Francës për vendimin e gjykatës shënon një ndarje midis pozicionit të saj dhe atij të aleatëve, përfshirë SHBA-në, Britaninë e Madhe dhe Italinë.

Ministria “dënoi masakrat antisemite nga Hamasi” gjatë sulmit ndaj Izraelit më 7 tetor, i cili u “shoqërua me akte torture dhe dhunë seksuale”.

Në deklaratën e ministrisë së Jashtme theksohet gjithashtu se Franca kishte paralajmëruar Izraelin “për nevojën për respektim të rreptë me ligjin ndërkombëtar humanitar, dhe në veçanti për nivelin e papranueshëm të viktimave civile në Rripin e Gazës dhe aksesin e pamjaftueshëm humanitar në enklavë”.

Prokurori i Gjykatës Ndërkombëtare Penale, Karim Khan tha të hënën se kishte kërkuar urdhër-arrest për Netanyahun dhe ministrin e Mbrojtjes Yoav Gallant për krime që përfshijnë “vrasje me dashje”, “shfarosje dhe/ose vrasje” dhe “vrasje nga uria” gjatë luftës në Gaza.

Khan tha gjithashtu se udhëheqësit e grupit militant palestinez Hamas, duke përfshirë Ismail Haniyeh me bazë në Katar dhe shefin e Gazës, Yahya Sinëar, mbajnë përgjegjësi penale për veprimet e kryera gjatë sulmit të 7 tetorit.

Presidenti i SHBA, Joe Biden, e quajti “skandaloze” kërkesën për urdhër-arrest kundër kryeministrit izraelit Benjamin Netanyahu dhe ministrit të mbrojtjes Yoav Gallant.

“Kërkesa e prokurorit të ICC-së për urdhër-arrest kundër udhëheqësve izraelitë është skandaloze. Dhe më lejoni të jem i qartë: çfarëdo që mund të nënkuptojë ky prokuror, nuk ka asnjë ekuivalencë – asnjë – midis Izraelit dhe Hamasit. Ne do të qëndrojmë gjithmonë me Izraelin kundër kërcënimeve ndaj sigurisë së tij’, thuhet në reagimin e Biden, thekson Biden./abcnews.al