Mediat amerikane njoftuan të premten se avokatët e ish-Presidentit Donald Trump u kanë dorëzuar hetuesve federalë në muajt e fundit, dokumente të tjera të klasifikuara, si dhe një laptop (kompjuter portativ), që i përkiste një ndihmësi të zotit Trump.
Sipas një personi në dijeni të çështjes, avokatët kishin dhënë gjithashtu dhe një dosje të zbrazët, ku shënohej informacion i klasifikuar.
Një prokuror i posaçëm i Departamentit të Drejtësisë po heton lidhur me posedimin nga ana e zotit Trump të qindra dokumenteve të shënuara si sekrete, në pronën e tij në Mar-a-Lago të Floridës.
Gjatë një kontrolli që ushtruan në muajin gusht, agjentët e FBI-së gjetën rreth 100 dokumente të klasifikuara, mes tyre dokumente të klasifikuara si tejet sekrete. Një juri e madhe federale po dëgjon tashmë prej muajsh prova lidhur me këtë çështje.
Lajmi mbi dokumentet e reja të gjetura në rezidencën e zotit Trump u njoftua fillimisht nga rrjeti televiziv ‘ABC News’.
Personi në dijeni të kësaj çështjeje tha se një numër i vogël dokumentesh të klasifikuara ishin gjetur gjatë një kontrolli që u mbikëqyr nga ekipi ligjor i zotit Trump disa javë më parë në Mar-a-Lago. Ato iu dorëzuan menjëherë Departamentit të Drejtësisë. Dokumentet u gjetën në një kuti që kishte me mijëra faqe dokumentesh të tjera, tha i njëjti person./VOA/
Moti sot me diell dhe pjesërisht i vranët
Turki Alalshikh ka gjetur kundërshtarin e radhës për Daniel ...
Kriza në Lindjen e Mesme, Blinken: Izraeli ka të drejtë të m...
Rama në OKB: Kosova, realitet i pakthyeshëm ndërkombëtar
Kurti u takua me kryeministrin e Kroacisë, diskutuan për rap...
Ushtria izraelite urdhëron banorët në disa zona të Bejrutit ...