Telenovela e ndërhyrjes ruse në zgjedhjet amerikane pëson një tjetër zhvillim orët e fundit. Një lobist ruso-amerikan ka deklaruar këtë të premte se ka qenë pjesëmarrës në takimin e qershorit të vitit 2016 me djalin e presidentit Donald Trump, duke shënuar kështu një tjetër kthesë në çështjen e diskutimeve se ai takim ishte në vazhdën e përpjekjeve të qeverisë ruse për të ndihmuar fushatën e republikanit për Shtëpinë e Bardhë.

Rinat Akhmetshin konfirmoi pjesëmarrjen e tij për “Associated Press” këtë të premte. Takimi forcoi edhe më tej pikëpyetjet nëse fushata e presidentit Trump është koordinuar me qeverinë ruse gjatë zgjedhjeve, gjë që është edhe në fokusin e hetimeve federale dhe atyre në Kongres, transmeton tch.

Në “e-mail”-et e publikuara nga Donald Trump Jr., më herët gjatë kësaj jave, një bashkëpunëtor që ndihmoi në zhvillimin e takimit tha se avokatja ruse donte t’i kalonte informacion dashakeqës mbi demokraten Hillary Clinton, e theksoi qartësisht se diskutimet ishin pjesë e përpjekjes së qeverisë ruse për të ndihmuar kandidatin republikan.

Edhe pse Trump Jr. konfirmoi se kryeprokurori rus ishte në takim, ai nuk deklaroi gjë për praninë e lobistit Akhmetshin. Djali i presidentit amerikan është përpjekur t’ia ulë vlerat atij takimi, duke thënë se nuk mori asnjë informacion siç i ishte premtuar.

Akhmetshin zbulon, ndërkohë, se takimi nuk ishte substancial dhe se realisht priste diskutime më serioze. “Kurrë nuk e mendova se ai takim do të ishte diçka me rëndësi kaq të madhe, e them sinqerisht”, është shprehur ai për “Associated Press”.

Jared Kushner, dhëndri i Trumpit dhe aktualisht këshilltar i lartë i Shtëpisë së Bardhë, si dhe ish-kreu i fushatës Paul Manaford kanë qenë gjithashtu pjesëmarrës në takim.

I pyetur në lidhje me Akhmetshin dhe pjesëmarrjen e tij të mundshme në takimin e qershorit të vitit 2016, Dmitry Peskov, zëdhënës i presidentit rus Vladimir Putin, tha për reporterët ditën e sotme se “nuk dimë asgjë rreth këtij njeriu”.