Departamenti i Drejtësisë i Shteteve të Bashkuara të Amerikës ngriti një padi kundër shtetit të Teksasit në lidhje me barrierat lundruese të vendosura nga ky shtet në lumin Rio Grande, qëllimi i të cilave të pengojnë emigrantët që përpiqen të kalojnë kufirin nga Meksika.

Javën e kaluar, autoritetet e Teksasit filluan instalimin e barrierave lundruese në mes të lumit, si pjesë e një nisme të quajtur “Operacioni Lone Star” të guvernatorit Greg Abbott.

Kjo nismë e tij kë për qëllim të dekurajojë emigrantët që të kalojnë përmes lumit në këtë shtet.

“Ne pretendojmë se Teksasi ka shkelur ligjin federal duke instaluar një pengesë në Rio Grande pa marrë autorizimin e kërkuar federal”, tha në një deklaratë prokurorja e përgjithshme e Vanita Gupta.

“Kjo pengesë lundruese paraqet kërcënim për lundrimin dhe sigurinë publike dhe paraqet shqetësime humanitare”, shtoi ajo.

Padia, e paraqitur në Gjykatën e Qarkut të SHBA-së në Distriktin Perëndimor të Teksasit, synon “të heqë të gjitha strukturat dhe pengesat, duke përfshirë një pengesë lundruese dhe të gjithë infrastrukturën që lidhet me të, në Rio Grande”, thuhet në dosjen gjyqësore.

Javën e kaluar, Jaime Esparza, avokati amerikan për Distriktin Perëndimor të Teksasit, kishte paralajmëruar për veprime të mundshme ligjore në një letër drejtuar guvernatorit Abbott.

Në përgjigje të paralajmërimit ligjor nga Departamenti i Drejtësisë, guvernatori Abbott i shkroi një letër presidentit demokrat Joe Biden të hënën, duke e akuzuar atë për neglizhencë të zbatimit të ligjeve të migracionit, gjë që, sipas Abbott, ka çuar në një “nivel rekord të migrimit të paligjshëm”.

Abbott, në një intervistë për Fox News, tha se nga pengesa e vendosur në lumë, potencialisht qindra mijëra njerëz nuk kanë mundur të hyjnë ilegalisht në vend.

“Ne besojmë se kemi të drejtë ta bëjmë këtë dhe do ta çojmë këtë padi deri në Gjykatën e Lartë të Shteteve të Bashkuara”, tha ai.

Meksika gjithashtu është ankuar për pengesën, duke thënë se ajo shkel një traktat uji dhe mund të cenojë territorin meksikan.

Përveç pengesës kufitare, Operacioni Lone Star i Abbott ka përfshirë gjithashtu dislokimin e mijëra trupave të Gardës Kombëtare dhe një fushatë për të transportuar emigrantët me autobusë drejt qyteteve më në veri, që janë të udhëhequr nga Demokratët.

Në muajt e fundit, trupat e Gardës Kombëtare kanë lidhur tela me gjemba për të bllokuar emigrantët që të kalojnë Rio Granden.

Numri i emigrantëve të kapur duke kaluar ilegalisht kufirin SHBA-Meksikë ka rënë që kur Biden zbatoi një politikë të re kufizuese të azilit në muajin maj.

Megjithatë, rreth 100,000 emigrantë u kapën në qershor duke kaluar ilegalisht kufirin./rel/