Prokurori i posaçëm Robert Mueller zyrtarizoi dje akuzat për 13 shtetas rusë dhe tre kompani ruse për ndërhyrje në zgjedhjet presidenciale amerikane të vitit 2016. Në akuzë pretendohet se rusët u përpoqën të ndihmojnë Presidentin Donald Trump dhe të dëmtojnë kundërshtaren e tij politike, kandidaten Hillary Clinton.

Prokurori i posaçëm Robert Mueller paraqiti akuza të detajuara për ndërhyrjen e Rusisë në zgjedhjet amerikane.

Dokumenti prej 37-të faqesh tregon se duke filluar që në vitin 2014, Rusia përdori postime të rreme në mediat sociale, si dhe reklama, për të ndikuar opionin publik në favor të kandidatit Donald Trump.

“Të akuzuarit zhvilluan luftë informative ndaj Shteteve të Bashkuara, siç e quajtën vetë, me objektiv të deklaruar mbjelljen e mosbesimit ndaj kandidatëve dhe sistemit politik në përgjithësi”, deklaroi Zëvendës Prokurori i Përgjithshëm, Rod Rosenstein.

Dymbëdhjetë nga të akuzuarit punonin për Agjensinë Kërkimore të Internetit, një kompani me seli në Rusi që zhvillon operacione influence në emër të Moskës.

Të akuzuarit përballen me tetë akuza penale, përfshirë përpjekjet për të mashtruar Shtetet e Bashkuara, konspiracion për mashtrim, si dhe vjedhje identiteti.

Megjithatë, nuk akuzohen zyrtarë të fushatës Trump për pjesëmarrje në këtë skemë.

“Nuk ka asnjë akuzë për amerikanë që mund të kenë marrë pjesë me vetëdije në këtë aktivitet të paligjshëm. Nuk ka asnjë akuzë se këto veprime të paligjshme mund të kenë ndryshuar rezultatin e zgjedhjeve të vitit 2016”, saktësoi zoti Rosenstein.

Presidenti Donald Trump e ka quajtur hetimin ndaj Rusisë një “rreng” dhe një “gjueti shtrigash”, të drejtuar nga kundërshtarët e tij politikë. Gjithashtu, ai ka refuzuar në mënyrë të përsëritur akuzat se Rusia ndërhyri në zgjedhje./VoA/