Ministri i Punëve të Jashtme të Turqisë, Mevlüt Çavuşoğlu, tha se vendi i tij do të vazhdojë zbatimin e Konventës Montreux pa standarde të dyfishta, transmeton Anadolu Agency (AA).

“Turqia ka respektuar gjithmonë marrëveshjet në të cilat është palë”, u shpreh Çavuşoğlu për rrjetin televiziv turk NTV, duke shtuar se Ankaraja do të vazhdojë zbatimin e Konventës Montreux me të gjitha nenet e saj dhe pa standarde të dyfishta.

Konventa e vitit 1936 i jep Turqisë kontrollin mbi ngushticat e saj dhe autoritetin për të rregulluar tranzitin e anijeve luftarake detare.

Në lidhje me thirrjen e presidentit rus Vladimir Putin që ushtria ukrainase të marrë kontrollin në Ukrainë, ai tha se këto komente ishin të çuditshme dhe të papranueshme.

Çavuşoğlu gjithashtu tha se ishte duke u zhvilluar procesi i evakuimit të shtetasve turq në Ukrainë.

Ndërhyrja ushtarake e Rusisë në Ukrainë hyri në ditën e dytë, me raportet e fundit që tregojnë se trupat ruse po shkonin drejt kryeqytetit Kiev nga disa drejtime.

Putin kishte urdhëruar ndërhyrjen ushtarake të enjten, vetëm disa ditë pasi njohu dy enklavat e kontrolluara nga separatistët në Ukrainën lindore.

Ai pretendoi se Moska nuk kishte plan për të pushtuar vendin fqinj, por donte të “çmilitarizonte” dhe “denazifikonte” Ukrainën.

Presidenti ukrainas Volodymyr Zelenskyy akuzoi Rusinë se po përpiqet të instalojë një qeveri-kukull dhe tha se ukrainasit do të mbrojnë vendin e tyre kundër agresionit rus.