Kryeministri britanik, Boris Johnson tha sot se një bllokim i ri do të vendoset në Londër dhe pjesë të Anglisë Jugore dhe Lindore për shkak të shqetësimeve në lidhje me një variant të ri të koronavirusit edhe pse pa asnjë provë.

“Varianti i ri i koronavirusit mendohet të përhapet me shpejtësi në rajon dhe thuhet të jetë 70% më i transmetueshëm”, sipas Johnson.

Sidoqoftë, nuk ka asnjë provë që varianti, i quajtur VUI 202012/01, ka një normë më të lartë vdekjesh ose çon në një sëmundje më të rëndë.

“Kur virusi ndryshon metodën e tij të sulmit, ne duhet të ndryshojmë metodën tonë të mbrojtjes”, tha Johnson gjatë konferencës për shtyp.

Sipas rregulloreve të reja që fillojnë nesër banorët mund të lënë shtëpitë e tyre vetëm për arsye të rëndësishme, dyqanet jothelbësore do të mbyllen dhe planet për të lehtësuar kufizimet e kontaktit gjatë Krishtlindjeve janë anuluar.

“Duke pasur parasysh provat e hershme që kemi mbi këtë variant të ri të virusit dhe rrezikun e mundshëm që paraqet, më duhet t’ju them se nuk mund të vazhdojmë me Krishtlindjet ashtu siç është planifikuar”, tha Johnson.

“Ne po sakrifikojmë shansin për të parë të dashurit tanë këtë Krishtlindje në mënyrë që të kemi një shans më të mirë për të mbrojtur jetën e tyre”, theksoi ai./ATSh/