Presidenti i SHBA-së, Joe Biden ka thënë se nuk beson që balona e dyshuar e spiunazhit kinez që fluturoi mbi hapësirën ajrore amerikane, ishte një shkelje e madhe e sigurisë, shkruan BBC.

Biden tha për Noticias Telemundo të enjten se nuk i vjen keq sesi e trajtoi situatën.

Balona u rrëzua mbi Atlantik pasi kishte udhëtuar nëpër SHBA. Disa ligjvënës e kanë kritikuar presidentin se nuk e shkatërroi atë më shpejt.

“Kjo nuk është një shkelje e madhe” tha Biden, duke shtuar se ishte “një shkelje e ligjit ndërkombëtar. Është hapësira jonë ajrore. Dhe sapo të vijë në hapësirën tonë, ne mund të bëjmë çfarë të duam me të”.

Ai u shpreh se ushtria ishte e shqetësuar se shkatërrimi i balonës mbi tokë do t’i kishte vënë njerëzit në tokë në rrezik.

“Ata morën një vendim të mençur. E qëlluan atë mbi ujë”.

Duke folur për BBC, Sekretarja e Shtypit e Shtëpisë së Bardhë, Karine Jean-Pierre, tha se do të ishte e vështirë të thuhej se si SHBA mund të trajtojë një situatë tjetër si kjo.

“Sigurisht që nuk do të hyj në mënyrën se si komuniteti i inteligjencës ose Pentagoni ecën përpara me këtë program dhe se si e vlerësojnë ata”, deklaroi ajo.

Të enjten, Dhoma e Përfaqësuesve miratoi një rezolutë jodetyruese që e quajti balonën një “shkelje të pacipë” të sovranitetit të SHBA-së, një veprim i hedhur poshtë nga Kina si “manipulim thjesht politik dhe hamendësim”.

Kina tha se ka refuzuar gjithashtu një telefonatë nga Sekretari amerikan i Mbrojtjes, Lloyd Austin, pasi SHBA rrëzoi balonën.