Gjeneral-lejtant Abdel Fattah al-Burhan është betuar si kreu i Këshillit Sovran të Sudanit, institucion që do të udhëheqë vendin gjatë një periudhe 3-vjeçare kalimtare, transmeton Anadolu Agency (AA).

Burhan do të udhëheqë Këshillin prej 11 anëtarësh për 21 muaj në kuadër të marrëveshjes për ndarjen e pushtetit midis Këshillit të Përkohshëm Ushtarak (TMC) dhe koalicionit të opozitës Forcat për Liri dhe Ndryshim (FFC).

Ai më vonë do të zëvendësohet nga një civil, i cili do të udhëheqë Këshillin për periudhën e mbetur 18-mujore, pas të cilës do të pasojnë zgjedhjet.

Këshilli Sovran përbëhet nga një personel i përbërë prej 5 ushtarëve të emëruar nga TMC-ja, 5 civilëve nga FFC-ja, si dhe nga një kandidat civil në pajtim midis dy palëve.

Burhan ka qenë komandant i forcave tokësore. Ai u emërua nga ish-presidenti Omar al-Bashir si inspektor i ushtrisë kombëtare disa muaj para rrëzimit të Al-Bashirit.

Nga grupet rebele Burhan akuzohet për kryerjen e mizorive në provincën Darfur në perëndim të Sudanit pasi ai ishte komandant i forcave ushtarake në shtetin qendror Darfur dhe ishte një nga ata që ishte përgjegjës për formimin e milicisë famëkeqe “Janjaweed” pas shpërthimit të konfliktit në vitin 2003.

Në muajin prill ushtria largoi nga pushteti al-Bashirin pas disa muajve të protestave kundër qeverisjes së tij 30-vjeçare.