Gjiganti i rrjeteve sociale, Meta pësoi një humbje të madhe ligjore të mërkurën, e cila mund të ndikojë negativisht në politikën e reklamave për Facebook dhe Instagram, pasi autoritetet kompetente evropiane zbuluan se përmes marrëveshjeve speciale, përdoruesit e këtyre mediave sociale ishin të detyruar të merrnin reklama të personalizuara.Sipas vendimit të gjykatës, gjoba e vendosur nga BE ndaj kompanisë Meta arrin në 390 milionë euro. Përveç kësaj, është e mundur – siç raportojnë rrjetet ndërkombëtare – që Meta (Facebook dhe Instagram) të detyrohet të bëjë ndryshime të kushtueshme.

Vendimi i së mërkurës lidhet me dy kallëzime ndaj Metës në vitin 2018. Pas shpalljes së gjobës, kompania e rrjetit social ka dalë me deklaratën e saj.

“ Ne besojmë se qasja jonë është në përputhje me Rregulloren e Përgjithshme të BE-së për Mbrojtjen e të Dhënave, prandaj jemi të zhgënjyer nga vendime të tilla”, thuhet në njoftimin përkatës.

Vendimi shihet si një nga më të rëndësishmit që kur blloku evropian prej 27 anëtarësh prezantoi legjislacionin që synon të kufizojë aksesin e Facebook dhe kompanive të tjera në mbledhjen e informacionit personal. Ligji hyri në fuqi në vitin 2018.

Arsyetimi i vendimit mbi të cilin është bazuar vendosja e gjobës ka të bëjë nëse lejohet ligjërisht mbledhja e informacionit nga platforma sociale për reklama të personalizuara.

Autoriteti i mbrojtjes së të dhënave të Irlandës ka thënë se autoritetet evropiane janë të përkushtuara ndaj kuadrit ligjor që do të mbulojë reklamat e personalizuara. Sipas urdhrit të gjykatës, Metës i kërkohet të respektojë një kuadër ligjor, i cili ende nuk dihet, por me gjasë do të përcaktojë aftësinë për të zgjedhur për reklamat e synuara.

Nëse një numër i madh zgjedh të mos ndajë të dhënat e tyre personale, atëherë Meta nuk do të jetë në gjendje të shërbejë reklama të personalizuara. Vihet re se informacioni rreth historisë së përdoruesve të rrjeteve sociale, i nxjerrë nga postimet e tyre të mëparshme ose nga lëvizje të caktuara në platforma, përdoret nga reklamuesit për të treguar produkte të llogarive personale që kanë më shumë gjasa të blihen.

Këto praktika inkurajohen nga Meta, e cila thuhet se kishte gjeneruar të ardhura prej 118 miliardë dollarësh në vitin 2021.

Gjoba prej 390 milionë euro e vendosur nga autoritetet evropiane është në kundërshtim me politikën e adoptuar nga SHBA-ja në këto raste.

Autoritetet amerikane nuk kanë krijuar asnjë kuadër ligjor për të mbrojtur të dhënat personale. Vetëm disa shtete si Kalifornia i kanë bërë këto lëvizje ligjore.

Megjithatë, çdo ndryshim nga Meta për shkak të gjobës evropiane mund të ndikojë edhe në llogaritë amerikane në platforma.