Michael Cohen, avokati personal i presidentit amerikan, Donald Trump ka pranuar një pagesë sekrete rreth 400,000 dollarë për të organizuar bisedimet në mes të presidentit ukrainas, Petro Poroshenko dhe Trumpit, është bërë e ditur sipas disa burimeve në Kiev, transmeton BBC.

Pagesa është planifikuar nga ndërmjetësuesit e liderit ukrainas, Petro Poroshenko kanë njoftuar këto burime, ndonëse Cohen nuk ka qenë i regjistruar si përfaqësues për Ukrainën, siç kërkohet me ligjin amerikan.

Takimi ka ndodhur në Shtëpinë e Bardhë në qershor të vitit të kaluar.

Pak kohë pasi Poroshenko është kthyer në shtëpi, agjencia ukrainase kundërkorrupsionit ka ndalur hetimet për ish-udhëheqësin e fushatës së Trumpit, Paul Manafort.

Një zyrtar i inteligjencës ukrainase në administratën e Poroshenkos ka përshkruar se çfarë ka ndodhur para vizitës në Shtëpinë e Bardhë.

Cohen është dërguar në takim, pasi lobistët e regjistruar të Ukrainës dhe ambasada ukrainase në Uashington kanë kërkuar më shumë se vetëm një fotografi të Trumpit me Poroshenkon.

Lideri ukrainas ka kërkuar diçka që mund të portretizohej si “bisedime”.

Deklarata e këtij zyrtari është si vijon: Poroshenko ka vendosur të krijojë një kanal me Trumpin. Detyra i është dhënë një ish-ndihmësi, i cili ka kërkuar ndihmë nga një ligjvënës ukrainas.

Nuk ka ndonjë supozim se Trump ka pasur njohuri për pagesat.

Një burim i dytë në Kiev i ka dhënë detajet e njëjta, mirëpo sipas tij Cohen është paguar 600,000 dollarë.