Ministrat e mbrojtjes të NATO-s i ngarkuan komandantët ushtarakë të mërkurën për të marrë masa për të forcuar qëndrimin e aleancës për shkak të “realitetit të ri” të futur nga pushtimi rus i Ukrainës.

“Ne po përballemi me një realitet të ri, kështuqë duhet të rivendosim mbrojtjen dhe parandalimin tonë kolektiv për një afat më të gjatë”, tha para gazetarëve Sekretari i Përgjithshëm i NATO-s, Jens Stoltenberg, transmeton portal arbresh.info

Ai shtoi se ministrat kanë ngarkuar komandantët ushtarakë të dalin me opsione për të paraqitur krerët e NATO-s.

Këto ka të ngjarë të përfshijnë “thelbësisht më shumë forca” në tokë, “më shumë fuqi ajrore aleate” duke përfshirë mbrojtjen e integruar ajrore dhe raketore, nëndetëse shtesë dhe “numër të konsiderueshëm anijesh luftarake”, ide se si “të shfrytëzohen më së miri asetet hapësinore aleate” dhe që ushtrimet stërvitore të zhvillohen “më shpesh dhe në numër më të madh”.

Stoltenberg ka theksuar se “përforcimet e mëdha të mbrojtjes sonë do të kërkojnë rritje më të mëdha të investimeve” , ndërsa ka vlerësuar Gjermaninë dhe Danimarkën për rritjen e investimeve në mbrojtje.

Aleatëve të NATO-s u kërkohet të shpenzojnë 2% të PBB-së së tyre për shpenzimet e mbrojtjes, por sipas të dhënave të NATO-s, vetëm 10 nga vendet anëtare të aleancës e bënë këtë vitin e kaluar. Këto janë Greqia, SHBA, Kroacia, MB, Estonia, Letonia, Polonia, Lituania, Rumania dhe Franca.

Rusia filloi pushtimin e Ukrainës më 24 shkurt, duke pretenduar se sulmi i saj ishte i nevojshëm për të mbrojtur popullsinë civile në territorin e diskutueshëm në Ukrainën lindore dhe duke akuzuar qeverinë e zgjedhur në Kiev për kryerjen e një gjenocidi.

Ukraina dhe aleatët Perëndimorë kanë hedhur poshtë pretendimet dhe kanë dënuar sulmin e “paprovokuar dhe të pajustifikuar”.

Në muajt që çuan në pushtimin, Moska kishte vendosur deri në 150 mijë trupa përgjatë kufirit të saj të përbashkët me Ukrainën, gjë që kishte shkaktuar bisedime të nivelit të lartë diplomatik me Uashingtonin mbi vendosjen e pajisjeve ushtarake të NATO-s në krahun e saj lindor.

Rusia argumentoi se trupat ishin vendosur për shkak të kërcënimit të sigurisë dhe kërkoi nga NATO që të hiqte trupat e saj ushtarake në disa vende të Europës Lindore, ndërsa gjithashtu ka kërkuar që Ukraina dhe Gjeorgjia të mos lejohen t’i bashkohen NATO-s.

Aleatët e NATO-s iu përgjigjën pushtimit me sanksione të koordinuara kundër Rusisë, ndërsa disa anëtarë, duke përfshirë BE-në, SHBA-në, Britaninë e Madhe dhe Kanadanë, e kanë furnizuar Ukrainën me armë vdekjeprurëse për t’u mbrojtur.

NATO gjithashtu forcoi pozicionet e saj në vendet anëtare lindore dhe forcoi patrullimet ajrore dhe detare në Detin Baltik.

Qindra mijëra forca të NATO-s janë vënë në gatishmëri të lartë, ndërsa SHBA-ja ka rritur forcat e saj të dislokuara në të gjithë Europën./euronews/arbresh.info/