Ministri i Jashtëm i Turqisë Mevlüt Cavusoglu deklaroi sot se Suedia dhe Finlanda duhet të ndalojnë mbështetjen e grupeve terroriste në vendet e tyre, të ofrojnë garanci të qarta sigurie dhe të heqin ndalimin e eksporteve të Turqisë nëse duan që Ankaraja zyrtare të mbështesë anëtarësimin e tyre në NATO.

Duke folur pas një takimi të ministrave të jashtëm të NATO-s në Berlin, Cavusoglu tha se ishte takuar me homologët e tij suedezë dhe finlandezë dhe se ata të gjithë po përpiqeshin t’i përgjigjeshin shqetësimeve të Turqisë.

Ai shtoi se Turqia nuk kërcënon dhe nuk përfiton askënd nga situata aktuale, por foli veçanërisht për mbështetjen e Suedisë për militantët kurdë PKK, të cilat Turqia, BE dhe SHBA e konsiderojnë organizatë terroriste.

Finlanda konfirmoi sot se do të aplikojë për anëtarësim në NATO dhe Suedia pritet të ndjekë shembullin, në përgjigje të pushtimit rus të Ukrainës.

Megjithatë, shqetësimet e Turqisë mund të jenë një pengesë, pasi çdo vendim për t’u anëtarësuar në NATO kërkon miratimin unanim të 30 vendeve anëtare.

“Këtu duhet të ketë garanci sigurie. Ata duhet të ndalojnë mbështetjen e organizatave terroriste,” u tha Cavusoglu gazetarëve turq në Berlin.

Kreu i diplomacisë turke shtoi se Suedia dhe Finlanda duhet të heqin ndalimin e eksportit të disa produkteve të industrisë së tyre të mbrojtjes në Turqi.

“Qëndrimi ynë është krejtësisht i hapur dhe i qartë. Ky nuk është kërcënim, nuk janë negociata në të cilat ne po përpiqemi të imponojmë interesat tona”, tha ai.

“As ky nuk është populizëm. Padyshim që bëhet fjalë për mbështetjen e dy shteteve anëtare potenciale për terrorizmin dhe ne kemi ndarë vëzhgimet tona të qarta për këtë”, shtoi ai.

Presidenti turk Recep Tayyip Erdogan befasoi aleatët e NATO-s dhe vendet skandinave të premten kur tha se Turqia nuk mund të mbështesë zgjerimin pasi Finlanda dhe Suedia janë “shtëpia e një numri organizatash terroriste”, por zëdhënësi i tij tha të shtunën se Turqia nuk i ka mbyllur dyert.

Cavusoglu përsëriti se Turqia, e cila u bashkua me NATO-n 70 vjet më parë, nuk është kundër një politike të dyerve të hapura.

Ai tha se bisedimet me homologët suedezë dhe finlandezë kanë qenë të mira dhe se ata kanë bërë sugjerime për të zbutur shqetësimet legjitime që Turqia do të marrë parasysh.

Ministri i Jashtëm turk vuri në dukje se ai u dha atyre prova se terroristët jetojnë në vendet e tyre.

Cavusoglu përsëriti mosrespektimin e Suedisë për pozicionin e Ankarasë, duke vënë në dukje se takimet e PKK po mbaheshin në Stokholm gjatë fundjavës.