Janë mbajtur zgjedhjet në Universitetin e Prishtinës, për personelin akademik dhe jo-akademik. Këto zgjedhje erdhën si pasojë e problemeve të vazhdueshme me të cilat është ballafaquar Universiteti i Prishtinës

Në fillim të muajit dhjetor, Qeveria e Kosovës kërkoi nga Ministria e Arsimit që të dërgojë drejt zgjedhjeve të përgjithshme Universitetin e Prishtinës.

Të drejtë kandidimi në këto zgjedhje kanë pasur të gjithë profesorët, dhe nga këto rezultate pritet të dalin përfaqësuesit në nivelet e Këshillit të profesorëve të fakulteteve përkatëse, anëtarëve e këshillit nga radhët e asistentëve, anëtarët e Këshillave të fakulteteve dhe Senatit nga radhët personelit jo-akademik, dhe anëtarët e Senatit nga profesorët.

Sipas kryetarit të Komisionit Qendror të Zgjedhjeve Marjan Demaj, deri më tani nuk është evidentuar ndonjë parregullsi

“Procesi i votimit është duke u zhvilluar në mënyrën më të mirë të mundshme, kanë votuar deri tani mesatarisht mbi 80 përqind dhe presim se sikurse zgjedhjet e studentëve q ë i patëm edhe këto të jenë zgjedhje të shkëlqyeshme ku të gjithë personeli edhe administrativ edhe akademik kanë pas rastin që të votojnë të preferuarit e tyre”, tha Demaj.

Rezultatet preliminare pritet të dalin gjatë mbrëmjes.

Universiteti I Prishtinës tash e sa vite, është ballafaquar me probleme të brendshme duke krijuar pakënaqësi dhe bllokadë të Senatit, ndërsa këto zgjedhjeve të të gjitha niveleve pritet t’i japin fund këtyre problemeve.