Universitetet publike të Gjilanit, Gjakovës dhe Mitrovicës edhe formalisht nga sot janë të pavarura.
Rektorët e tyre në prani edhe të ministrit të Arsimit, Arsim Bajrami, nënshkruan sot marrëveshjen për pavarësim nga Universiteti publik i Prishtinës.

Ministri i Arsimit, Shkencës dhe Teknologjisë, z. Arsim Bajrami dhe rektori i Universitetit të Prishtinë “Hasan Prishtina”, z. Ramadan Zejnullahu, kanë nënshkruar marrëveshje me u.d. rektorët e Universitetit të Gjilanit, Mitrovicës dhe Gjakovës, me të cilën këto universitete të reja publike pavarësohen nga Universiteti i Prishtinës.

Ministri Bajrami e vlerësoi këtë ngjarje si shumë të rëndësishme, sepse tha se manifeston kulturën akademike, të cilën po ndërtojmë. “Universiteti i Prishtinës ka qenë dhe vazhdon të jetë vatra kryesore e edukimit të arsimit të lartë në Kosovë. Nga ky Universitet jo vetëm që është krijuar një elitë akademike, por është krijuar edhe një rrjet i universiteteve publike, sepse tani kemi gjatë universitete publike”.

Decentralizimin e universiteteve të reja publike, ministri e vlerësoi si një projekt sfidues, duke qenë se të gjitha kanë dalë nga Universiteti i Prishtinës, ndërsa tha se tani ka ardhur koha që këto universitete të reja të konsolidohen dhe të pavarësohen dhe ato dalëngadalë të marrin përgjegjësinë edhe për aspektet akademike, menaxheriale dhe financiare.