Fillimi i vitit të ri shkollor të martën ka nisë në të gjitha shkollat fillore dhe të mesme të komunës së Ferizajt.

Bazuar në raportin e Drejtorisë së Arsimit në Ferizaj, të gjitha përgatitjet janë bërë me kohë dhe se në këtë rrafsh nuk është raportuar për ndonjë problem.

I pari i kësaj drejtorie,Muhamet Halili, gjatë një konference për medie ka bërë të ditur se krahasuar me vitin e kaluar, këtë vit është punuar shumë në përmirësimin e kushteve teknike, për të cilat u tha se nuk do të jenë shkaktare të ndonjë vonese eventuale.

Sipas zyrtarëve të arsimit edhe përkundër premtimeve të shumta nga MASHT-i edhe këtë vit shkollor, nxënësit e shkollës së mesme ekonomike”Faik Konica” nuk do ta fillojnë në objektin e ri. Kjo për faktin se MASHT-i është vonuar në sigurimin e fondeve shtesë për përfundimin e këtij objekti.

“Kjo është në kompetencë të MASHT-it, ne, kemi pasur disa takime, e kemi pasur edhe ministrin e arsimit në vizitë, ku edhe ai ka premtuar se shkolla do të jetë e gatshme me 1 shtator. Për shkak të vonesave të rishikimit të buxhetit, nuk ka mund të bëhet alokimi i mjeteve te operatori ekonomik në mënyrë që shkolla të përfundoj. Edhe pse nuk kanë mbet shumë punë të mëdha nuk kemi mundur që nxënësit t’i transferojmë në këtë objekt”, ka thënë Halili.

Ndryshe, u bë e ditur se të gjithë nxënësit e shkollave fillore dhe të mesme të ulëta janë pajisur me tekste shkollore, ndërsa sa i përket regjistrimit të nxënësve në klasat e dhjeta u tha se ky proces me përjashtim të shkollës së mesme për Agrobiznes dhe Teknologji ka përfunduar në të gjitha shkollat.

“Vende të lira ka vetëm në shkollën e mesme për agrobiznes dhe teknologji, ndërsa në të gjitha shkollat tjera kuotat e regjistrimit janë plotësuar. Sivjet interesimi për shkollat profesionale ka qenë më i lartë. Siç po shihet edhe masat stimuluese të komunës për drejtimet e këtyre shkollave kanë dhënë sukses”, ka thënë drejtori i DKA-së, Muhamet Halili.