Mbledhja e Këshillit Drejtues të Universitetit të Prishtinës “Hasan Prishtina”, e cila pritet të mbahet në ora 16:00 ku si rend dite do të jetë kërkesa e senatorëve për shkarkimin e rektorit të këtij universiteti Ramadan Zejnullahu, ka zgjuar reagime të përfaqësuesve të arsimit në nivele të shtetit.

Kryetari i Komisionit Parlamentar për Arsim, Nait Hasani ka kërkuar të mos ndërpritet puna e rektorit Ramadan Zejnullahu.

Në një prononcim për “Zërin”, Hasani deklaron se mbrojtja e rektorit jep shpresë për cilësi dhe arsim evropian.

“Nuk duhet të ndërpritet rektori. Duhet përgjegjësi e Ministrisë së Arsimit për këto veprime në Këshill Drejtues”, ka thënë Hasani.

Ai ka vlerësuar punën e rektorit në zbatimin e ligjit dhe statutit, si dhe në ngritjen e cilësisë në arsim.

“Duhet të mbjellim dije e kulturë, edukatë dhe mirësjellje. Vetëm me dije mund të krijojmë vlerë dhe dinjitet, si dhe të jemi të barabartë në vlerësim në konkurrencë me universitetet e Evropës”, ka thënë Hasani.