Skip to content
Rreth 20 mijë veteranë, të cilët dyshohet se janë të rrejshëm, do të vazhdojnë të marrin pagesa mujore nga shteti derisa nuk faktohet nga institucionet e drejtësisë se ata nuk kanë qenë pjesë e Ushtrisë Çlirimtare të Kosovës. Nëse vërtetohet se mbi 19 mijë përfitues të pensioneve janë veteranë të rrejshëm, atëherë i bie që për tetë muaj të këtij viti buxheti i shtetit të jetë dëmtuar për rreth 26 milionë euro.
Ndonëse ka dyshime se rreth 20 mijë veteranë, të cilët marrin pensione nga shteti i Kosovës, janë të rrejshëm asnjërit prej tyre ende nuk i është ndalur pagesa mujore.
Kështu, ata do të vazhdojnë të marrin një pagë nga buxheti, pasi që konsiderohet se ndalja e pensioneve për ta nuk mund të bëhet derisa nuk faktohet se ata nuk janë veteranë të rrejshëm. Muharrem Shahini, zyrtar për Informim në Ministrinë e Financave, në një prononcim për “Zërin” e ka pohuar se veteranëve u kanë dalë pensionet.
Ndërsa zyrtarë të Zyrës për Informim në Ministrinë e Punës dhe Mirëqenies Sociale në një prononcim për gazetën “Zëri” kanë treguar se asnjërit prej veteranëve, as atyre që po dyshohet se janë të rrejshëm, nuk u janë ndalur pensionet.
