Sindikata e Bashkuar e Arsimit, Shkencës dhe Kulturës në shtator ka paralajmëruar hyrjen në grevë nëse nuk aprovohet ligji për mësimdhënësit e viteve të 90-ta dhe nëse nuk ndryshohet projektligji për pagat e mësimdhënësve.

Njohës të çështjeve të arsimit thonë se grevat nuk janë zgjidhje dhe SBASHK-u duhet të ketë kërkesa të qarta dhe që mund të realizohen nga buxheti i shtetit.

Kryetari i SBASHK-ut, Rrahman Jasharaj, tha për Radio Kosovën, se nëse pas fillimit të punës në Kuvendin e Kosovës nuk do të kalojë projektligji për statusin e mësimdhënësve të viteve 90-ta dhe ndryshimi i ligjit për pagat ku mësimdhënësit janë vendosur në pozitë degraduese, atëherë në shtator sistemi arsimor do hyjë në grevë.

“Kemi telashe dhe përplasje edhe me ligjin për pagat, ku përsëri sistemi arsimor ishte vënë në një pozitë degraduese dhe të ulët. Nëse këto nuk ndodhin atëherë SBASHK-u nuk ka zgjidhje tjetër.
Fatkeqësisht nëse këto dy gjëra nuk realizohen ashtu siç kërkohet, atëherë në shtator do të kemi veprime sindikale.”

Ndërkaq, eksperti i arsimit, Dukagjin Pupovci, tha për Radio Kosovën se grevat nuk duhet të shihen si zgjidhje e kërkesave të sistemit arsimor dhe kërkesat e SBASHK-ut duhet të jenë reale.

Sa i përket ligjit për pagat e mësimdhënësve duhet të japin propozime konkrete se ku duhet të klasifikohen sipas përgatitjes profesionale, theksoi Pupovci.
“ Kërcënimi me grevë nuk është zgjidhje, por është zgjidhje të kërkohen mundësitë reale për aprovimin e projektligjit siç është ai për të japin propozime konkrete se ku mendojnë ata që duhet të jenë dhe t’i mbrojnë ato në strukturat përkatëse, varësisht aty ku është ligji duke u shqyrtuar.”

Projektligji për mësimdhënësit e viteve të 90-ta kërkon një kosto të lartë buxhetore dhe për ketë arsye është kundërshtuar nga Fondi Monetar Ndërkombëtar dhe Ministria e Financave.