Komisioni për Punë të Brendshme, Siguri e Mbikëqyrje të FSK-së ka votuar pakon me tre projektligje që lidhen me shndërrimin e FSK-së në ushtri, duke i proceduar ato në seancën plenare të Kuvendit të Kosovës.

Transformimi i FSK-së i bëri bashkë pozitë e opozitë, të cilët i mbështetën projektligjet, me përjashtim të Listës Serbe, përfaqësuesi i së cilës në këtë komision u shpreh kategorik kundër, duke paralajmëruar njëherësh se nuk do të votojnë pro shndërrimit në ushtri të Kosovës.

Por sot në mbledhjen e krysisë së Kuvendit të Kosovës është vendosur që ligjet për ushtrinë të kalojnë për seancën e së enjtes, e jo në seancën e sotme.

Kjo ka bërë që dy partitë opozitare LDK-ja dhe Vetëvendosja të mos marrin pjesë në seancën e sotme, kurse akuzuan kryeparlamentarin Kadri Veseli, se qëllimisht ka manipuluar me këto ligje.

Kryesia e Kuvendit të Kosovës mbajti mbledhjen e radhës me shefat e grupeve parlamentare, e aty u vendos që seanca e radhës të mbahet të enjten, më 18 tetor.

Ndërkaq, në orën 10:00, pritet të vazhdojë seanca plenare e Kuvendit, me pikat e mbetura.

Në rend dite janë gjithsej 25 pika.

Armend Zemaj nga LDK-ja, tha se nuk marrin pjesë në seancën e sotme që është vazhdim i asaj të mbetur në gjysmë, raporton Arbresh.info

“Arsyet tashmë janë të ditura. Seanca e thirrjes për të enjten ka ligje më me rëndësi që kanë të bëjnë me shndërrimin e FSK-së në Ushtri. LDK-ja do të marr pjesë në seancën e së enjtes”, tha ai.

Ndërkaq, Albulena Haxhiu nga Vetëvendosja, tha se në këtë mbledhje të kryesisë është vendosur që seanca e radhës të mbahet të enjten.

“Konfirmojmë qëndrimin e VV-së, do të jemi në seancën e së enjtes që ka të bëjë me FSK-në. Por ne shprehim shqetësimet ku pati kërkesa që kjo pako të shtyhet sepse nuk ka buxhet. Tek tash e kanë kuptuar se nuk kanë buxhet për avancimin e FSK- së, por ne insistuam që të jetë në seancë”, tha Haxhiu.