Datat 5, 6 dhe 7 korrik do të jenë datat në të cilat do të zhvillohet Forumi i Bashkë-Investimeve dhe Rrjetëzimit, i cili organizohet në Prizren nga organizata Germin në bashkëpunim me Komunën e Prizrenit dhe partnerë të tjerë, të cilët do të sjellin së bashku 60 biznese nga diaspora dhe vendet tjera.

Folës kryesor i kësaj ngjarje është Lazim Destani, Kryetar Nderi i Rrjetit Global të Bizneseve të Diasporës Shqiptare dhe anëtar i Këshillit Koordinues të Diasporës, themeluar më 2019 nga Këshilli i Ministrave i Republikës së Shqipërisë. Si sipërmarrës i suksesshëm, filantrop dhe mbështetës entuziast i popullit shqiptar, ai në mes të tjerash do të ndajë me pjesëmarrësit dhe të ftuarit, praktikat dhe përvojat e mira të shfrytëzimit të potencialit të investimeve të diasporës.

Sipas Destanit, diaspora është një nga pistonët më të fuqishëm dhe me anë të një koordinimi të vazhdueshëm, ajo mund ta bartë rolin udhëheqës për ekonominë e atdheut, përcjell albinfo.ch.

Pas hapjes zyrtare nga Haskuka dhe fjalimit të Destanit, folësit e tjerë do të jenë Pandeli Majko – Ministër i Shtetit për Diasporën, znj.Liza Gashi drejtoreshë e organizatës Germin dhe znj.Nora Hasani drejtoreshë menaxhuese në Odën Ekonomike Gjermano-Kosovare.

Në këtë forum si të parin e këtij lloji në nivel lokal, Komuna e Prizrenit gjatë ditës së dytë (6 korrik), do të prezantojë vizionin dhe projektet kapitale për investitorët potencial të këtij qyteti.

Disa nga projektet që do të prezantohen janë: Parqet e Biznesit (Parku i Inovacionit dhe Trajnimeve) & Zona Ekonomike; Vizioni për Reciklimin dhe Ngrohtoren e Qytetit, Strategjia e Turzimit (Projekti i Teleferikut), Reforma në Shërbimet Administrative (One Stop Shop), etj. Ndërsa në pjesën e dytë organizohen 3 panele të cilat do të mbahen në Parkun e Inovacionit dhe Trajnimeve (ish-kampi i KFOR-it Gjerman). Në këto panele të diskutimit do të trajtohet ambienti biznesor në Kosovë, potenciali i Diasporës, dhe mundësitë e krijimit të urave bashkëpunuese për investime. Këto aktivitete do të mbahen më 6 korrik 2019. Takimet Bizneset tek Bizneset (B2B), dhe lansimi i Zyrës së Diasporës do të jenë aktivitet përmbyllëse të cilat mbahen më 7 korrik 2019.

Forumi i Bashkë-Investimeve dhe Rrjetëzimit hapet më 5 korrik 2019, nga ora 19:00 (regjistrimi) në kompleksin e “Lidhjes së Prizrenit”.