Kosova sivjet merr pjesë për herë të dytë në Festivalin e Kodit në Angli, i organizuar nga Young Rewired State (YRS), me seli në Londër. Ky aktivitet i cili cilësohet si ngjarja më e madhe e përvitshme në fushën e teknologjisë për hakerët e rinj në botë mundësohet nga kompania lidere e teknologjisë në Kosovë, Cacttus.

“Për herë të parë në këtë ngjarje Kosova mori pjesë në vitin 2014, edhe pse ishte hera e parë, ajo i ka marrë dy çmime” thotë Elona Dika, lidere e trajnimit të zhvillimit.

Ky festival mbahet nga data 27 Korrik deri më 31 Gusht, ku programuesit e rinj do të mbajnë aktivitete vullnetare të udhëhequr nga qendra lokale për zgjedhjen e problemeve të kodimit në botë. Ky festival u mundëson të rinjve të zhvillojnë aftësitë e tyre me ndihmën e mentorëve ekspertë dhe kolegëve.

Festivali i Kodit filloi punën e tij në vitin 2009  me 50 të rinj autodidakt në kodim. Që nga ai vit, numri ka shkuar duke u rritur në 1200 të rinj nga Mbretëria e Bashkuar, Shtetet e Bashkuara të Amerikës, Gjermania dhe Kosova.

Jozefi Komani 10 vjeç është njëri prej koduesve të rinj kosovar që po merr pjesë në festivalin e kodimit në Londër. Ai tregon për përshtypjet e tij në Festivalin e Kodit: “Kam marrë pjesë edhe vitin e kaluar në Festivalin e Kodit, më ka pëlqyer shumë, prandaj edhe sivjet do të jem pjesë e këtij festivali”.

Young Rewired State është komunitet i programuesve nën moshën 18 vjeçare, të cilët prezantohen në botë, përmes mentorëve ekspertë e kolegëve që kanë të përbashkët dashurinë rreth teknologjisë.

Qëllimet e YRS janë që të identifikojnë e edukojnë një komunitet me kodues të rinj dhe t’i pajis ata me aftësitë që të bëhen profesionistë në teknologji dhe t’iu japë mundësi të tjera për të ardhmen.