Vendet e zbarëta në disa pozita të Qeverisë, përfshi edhe Ministrinë e Drejtësisë, do të mbeten të tilla deri në përfundimin e bisedimeve për zgjerimin e koalicionit qeverisës.

Fadil Zendeli nga Lëvizja Besa tha se partia e tij mund të bëhet pjesë e qeverisë nëse arrihet marrëveshje që do të ishte e pranueshme edhe për partinë edhe për kryeministrin.

“Lëvizja Besa, është deklaruar se është e interesuar për të kontribuar. Dhe nëse do të kishte bisedime dhe negociata me kryeministrin, dhe nëse vihet në një marrëveshje të pranueshme për L.Besa, dhe për kryeministrin, mund të bëhemi pjesë e shumicës parlamentare, unë kam pasur kontakte me kryeministrin dhe pres pas festave të pashkëve do të ketë kontakte më intensive”, tha Fadil Zendeli, deputet i Lëvizjes Besa.

Nga BDI, thonë se nuk u pengon asnjë parti tjetër shqiptare të bëhet pjesë e Qeverisë.

“Kam apeluar që vende ka për të gjitha subjektet politike shqiptare, të cilët janë pjesë e Parlamentit. Duke u nisur nga këto parime, ka hapësirë dhe vende për bashkëpunim , për të qenë pjesë e ekzekutivit edhe subjektet tjera politike shqiptare, kryesia e Bashkimit Demokratik për Integrim, e ka autorizuar për t’i detajuar liderin Ali Ahmeti”, tha Rexhail Ismaili, deputet i BDI-së.

Edhe zëdhënësi i qeverisë tha se bisedimet për zgjerimin e koalicionit po rrjedhin.

“Nuk mund të përmend data specifike, ajo që mund të paralajmëroj është se bisedimet, përkatësisht zgjerimi i koalicionit qeverisës, po rrjedh”, tha Mile Boshnjakovski, zëdhënës i Qeverisë.

PDSH-ja e Menduh Thaçit nuk u përgjigjet në pyetjeve të TV21, nëse po zhvillojnë bisedime me Kryeministrin Zaev për zgjerim të koalicionit. Pjesë e bisedimeve për hryje në qeveri është edhe Partia Turke në Maqedoni./TV21/