Kosova do të hetojë ekstradimin e gjashtë të dyshuarve të lëvizjes së Fethullah Gylen, FETO. Operacioni mund të ketë pasoja për vendin, pasi Kosova kërkon të forcojë lidhjet me Bashkimin Evropian.

Kryeministri i Kosovës, Ramush Haradinaj urdhëroi të shtunën një hetim për arrestimin dhe dëbimin e gjashtë shtetasve turq nga Kosova në një operacion, që ai thotë se ishte urdhëruar pa dijeninë e tij.

Ankara pretendoi se gjashtë burrat ishin anëtarë të lëvizjes së Fethullah Gylenit, klerikut turk me qëndrim në SHBA.

Grupi përfshiu pesë mësues nga një shkollë e Gylenit dhe një mjek, të cilët u ekstraduan të enjten në Turqi në një operacion për ekstradim nga Ministria e Brendshme e Kosovës dhe shërbimi i spiunazhit (AKI) së bashku me Organizatën Kombëtare të Inteligjencës të Turqisë (MIT), shkruan DW.

Pas një takimi urgjent me personelin e sigurisë kombëtare, Haradinaj përsëriti se ai nuk ishte informuar për operacionin, gjë që e ka shtyrë të shkarkojë ministrin e Brendshëm, Flamur Sefaj dhe shefin e AKI-së, Driton Gashi.

“Ata ishin të detyruar të më informonin [për dëbimin], ata nuk e kishin bërë këtë, ata nuk kishin besim të mjaftueshëm për ta ndarë rastin me mua, prandaj nuk u besoj më shumë atyre, ata kanë humbur besimin tim”, tha ai

Haradinaj tha se ai kishte urdhëruar secilën prej institucioneve të përfshira që “të angazhohen plotësisht në sqarimin e përgjegjësive institucionale, shkeljeve të mundshme kushtetuese dhe ligjore dhe menjëherë të ndërmarrin hetime gjithëpërfshirëse dhe të detajuara”.

Turqia fajëson Gylenin për një grusht shteti të dështuar në vitin 2016 në Turqi, një veprim që lëvizja e tij e ka mohuar.

Presidenti turk Recep Tayyip Erdogan, tha të shtunën se ai ishte ‘i pikëlluar’ nga se Haradinaj e kishte shkarkuar premten ministrin e Brendshëm dhe shefin e AKI-së për deportimin e gjashtë shtetasve turq pa lejen e tij.

Erdogan tha se Haradinaj do ta paguajë për veprimet e tij.
“Që kur keni filluar të mbroni ata që punuan për të bërë një grusht shteti kundër Republikës Turke?”, tha ai.

Agjencia shtetërore turke e lajmeve Anadolu Agency i përshkroi burrat si persona të lartë në lëvizjen Gulen.

Prokurori i Stambollit po heton njerëzit që sipas Anadolu, po organizonin lëvizjen e Gylenistëve nga Turqia në Shtetet e Bashkuara dhe në vendet e Evropës.
Turqia e ka quajtur lëvizjen Gulen një organizatë terroriste, qëllimi i së cilës është të rrëzojë qeverinë.

Florian Bieber, ekspert i Ballkanit në Universitetin e Grazit në Austri, i tha agjencisë së lajmeve Reuters se incidenti mund të ishte i dëmshëm për Kosovën, një vend që po përpiqet të ndërtojë lidhje më të ngushta me Bashkimin Evropian.

“Sigurisht që do të dëmtojë Kosovën, si për të hedhur dyshime mbi sundimin e ligjit dhe autoritetin politik, dhe për bashkëpunimin me një regjim që është autoritar dhe gjithnjë e më antagonist ndaj BE”, tha Bieber për Reuters.

Ndaj arrestimit dhe depërtimit të shtetasve turq ka reaguar edhe organizata ndërkombëtare për të drejtat e njeriut “Human Right Watch” (HRW).
“Përveç arrestimeve të diskutueshme, ata u dërguan në një vend ku ata përballen me një rrezik serioz të torturës”, tha HRW në një deklaratë.