UNMIK-u bën të ditur se në dhjetor të vitit 2016 i dërgoi Interpolit notën e autoriteteve të Kosovës, përmes së cilës kërkohej që fletarrestet ndaj 20 qytetarëve të Kosovës të mënjanohen, bën të ditur Tanjug.

Misioni i Kombeve të Bashkuara në Kosovë në këtë mënyrë ndërmjetësoi mes Prishtinës dhe Interpolit në bazë të rolit që ka në përputhje me Rezolutën e Këshillit të Sigurimit të Kombeve të Bashkuara 1244.

Kështu thuhet në komunikatën të cilën zëdhënësi i zyrës së UNMIK-ut për Komunikim Publik dhe Punë Publike, Sanam Dollatshah ia ka dërguar Tanjugut si përgjigje në pyetjen e agjencisë, përmes së cilës UNMIK-u ka dhënë pëlqimin se kërkon mënjanimin e fletarrestimit ndaj kryeministrit aktual të Kosovës, Ramush Haradinaj, të cilin Serbia e ngarkon për krime lufte, si dhe çfarë natyre në fakt janë ato fletarreste.

Në sqarimin rreth rolit të UNMIK-ut në lidhje me vendimin e Interpolit, në komunikatë theksohet se “në përputhje me rolin e UNMIK-ut në bazë të Rezolutës 1244 të Këshillit të Sigurimit të OKB, më 2002 UNMIK-u ka nënshkruar Memorandumin për Mirëkuptim me Interpolin”.

Bëhet fjalë për Memorandumin “Bashkëpunimi për pengimin e krimit dhe në të drejtën penale”, qëllim i së cilit, siç thuhet, ishte që të vendoset korniza për bashkëpunim ndërmjet dy palëve, përfshirë shkëmbimin e informatave policore, publikimin dhe qarkullimin fletarresteve të Interpolit, qasjen në rrjetet dhe bazat e të dhënave të Interpolit…, shkruan Tanjugu, transmeton Koha.net.

Në komunikatë bëhet e ditur se Memorandumi i Mirëkuptimit ndërmjet Interpolit dhe UNMIK-ut është ende në fuqi.

“Prandaj, UNMIK-u vepron si ndërmjetës ndërmjet autoriteteve të Kosovës dhe Interpolit, kur bëhet fjalë për të gjitha çështjet në lidhje me pengimin e kriminalitetit, bashkëpunimin policor dhe të drejtën penale”, thuhet në komunikatë.

Në këtë kontekst, thuhet në vazhdim, UNMIK-u në dhjetor të vitit 2016 i ka dorëzuar Interpolit notën e autoriteteve të Kosovës, në të cilën kërkohet mënjanimi i fletarresteve ndërkombëtare kundër 20 qytetarëve të Kosovës, dhe këtë e ka bërë në bazë të Rezolutës 1244 të Këshillit të Sigurimit të OKB-së, “siç ka vepruar në të gjitha rastet në të kaluarën”.

Interpoli ka hequr nga lista e të kërkuarve 18 persona nga Kosova që i kërkon Serbia, dhe ndër ata emra është edhe kryeministri i Kosovës, Ramush Haradinaj.

Të gjithë ata janë të lirë të udhëtojnë jashtë territorit të Kosovës pa ndonjë problem.