Google ADS

Rënia e madhe e Nismës në Malishevë dhe dështimi në Prizren, Gjilan e Gjakovë

17:45 | 24 Tetor 2017
M. A.

Nisma për Kosovën ka arritur të shkojë në balotazh vetëm në qytetin e Malishevës.

Kandidati i Nismës për Malishevën, Ragip Begaj do të ketë përballë Mursel Gashin e PDK-së në balotazhin e 19 nëntorit.

Përkundër kësaj, Nisma për Kosovën ka humbur një numër të madh të votave në këtë qytet, raporton lajmi.net

Nga 10 mijë e 442 vota sa kishte pasur Begaj në zgjedhjet lokale të vitit 2013, në zgjedhjet e së dielës Begaj ka arritur të fitojë 8 mijë e 885 vota.

Pra, del se në vendlindjen e Limajt, Nisma për Kosovën ka humbur mbi 1 mijë e 500 vota.

Humbje po cilësohet edhe Drenasi. Kandidati i kësaj partie nuk ka arritur që ta sigurojë balotazhin me Ramiz Lladrovcin, i cili ka fituar mbi 55% të votave.

Përkundër se Xhemajlaj ka arritur ta ruajë votën, ai nuk ka arritur t’i bëj konkurencë edhe njëherë Lladrovcit të PDK-së, ashtu siç kishte bërë në zgjedhjet e dhjetorit, ku për herë të parë Drenasi shkoi në balotazh.

Kandidati i Nismës për kryetar të Prizrenit, Zafir Berisha ishte njëri nga më të zëshmit. Por, ai nuk ka arritur as t’i ruajë votat e zgjedhjeve lokale të 2013-ës, kur garoi si pjesë e Bashkimit Demokratik.

Aso kohe, Berisha kishte fituar mbi 8 mijë e 500 vota, kurse në zgjedhjet e së dielës kandidati i Nismës nuk ka arritur ta kap as shifrën e 5 mijë votave.

Përqindje të vogël të votave Nisma ka marrë edhe në komunat e tjera të mëdha të Kosovës.

Në kryeqytet, ministri i Arsimit Shyqeri Bytyqi, nuk ka arritur të sigurojë më shumë se 567 vota.

Fazli Hoxha, kandidati i Nismës për Gjakovën gjithashtu ka pasur numë të vogël të votave, njejtë sikur Bajram Hasani në Gjilan dhe Qazim Shala në Mitrovicë.

Shpërndaje në rrjete sociale

Të ngjashme