Dy vite kanë kaluar që nga vdekja e vogëlushit sirian, Aylan Kurdi, trupi i të cilit qëndronte i shtrirë pa jetë në një nga plazhet e Turqisë.

Fotografia me trupin e tij të pajetë, tërhoqi vëmendjen e botës mbi krizën e emigrimit dhe ngjalli debat të madh mbi krizën e emigrantëve që përpiqeshin të arrinin në Europë, transmeton portali arbresh.info

Rreth 2,200 persona kanë humbur jetën dhe janë zhdukur gjatë këtij viti në detin Mesdhe, përderisa liderët europianë dhe ata afrikanë kanë filluar një plan të ri që synon ndalimin e emigrantëve që udhëtojnë nga Deti Mesdhe.

Presidenti francez, Emmanuel Macron, tha se do të marrë masa ndaj trafikantëve që e kanë kthyer Detin Mesdhe në një ‘varrezë’.

Marrëveshja mes Francës, Italisë, Spanjës, Gjermanisë, Çadit, Nigerisë dhe Libisë, ka për qëllim të frenojë emigrimin nga Afrika e Veriut për në Europë.

Në mars të vitit 2016, Bashkimi Europian nënshkroi një marrëveshje me Turqinë për frenimin e emigrantëve që udhëtonin për në Greqi. Marrëveshja parashikonte që emigrantët që ndalonin në ishujt grekë të ktheheshin në brigjet turke.

Në këmbim të kthimit të emigrantëve, Turqia morri nga BE-ja disa miliarda euro për të ndihmuar në menaxhimin e komunitetit të refugjatëve në vend.

Gjatë muajve të fundit, Italia ka ndihmuar rojet bregdetare libiane në mënyrë që ata të përforcojnë përpjekjet për të ndaluar kontrabandën e njerëzve.

Jeff Crisp, një ekspert i refugjatëve në Universitetin e Oksfordit tha se mbyllja e rrugës në mes të Turqisë dhe Greqisë, ku edhe humbi jetën vogëlushi kurd, fillimisht kishte krijuar ‘një ndjenjë kënaqësie në Europë’.

“Më pas filloi kriza e emigrantëve nga Libia”, shtoi ai.

Që nga viti 2014, rreth 600 mijë emigrantë nga Afrika Veriore kanë arritur në Itali përmes detit. Megjithatë, gjatë muajit korrik të këtij viti, numri i emigrantëve ka shënuar rënie në krahasim me vitin e kaluar.

Arsyet për këtë rënie të shpejtë janë të diskutueshme, por ekspertët thonë se aktivitetet e rojeve bregdetare libiane dhe kushtet e motit janë një ndër arsyet kryesore.

Krerët europianë shpresojnë se mbështetja e kufirit jugor të Libisë dhe ofrimi i rrugëve ligjore do të rezultojë në vazhdimin e këtij trendi./arbresh.info/