Kryeministri në detyrë, Isa Mustafa, ka kërkuar nga ministrat në detyrë të Qeverisë së tij, të cilët kanë fituar dhe mandatin e deputetit të deklarohen se cilën pozitë do ta mbajnë, pasi që ligji nuk u lejon që t’i ushtrojnë të dy pozita në të njëjtën kohë, atë të deputetit dhe të ministrit në detyrë.

Ai tha se janë nëntë ministra të këtij kabineti qeveritar, të cilët kanë tashmë edhe postin e deputetit të Kuvendit të Kosovës, e të cilët pritet të betohen nesër në seancën konstituive.

“Është zëvendëskryeministri Kelmendi, është ministri Hoxhaj. Është ministri Hoti, është ministri Zharku, është ministrja Bajrami. Është ministri Krasniqi, është ministri Rasim Demiri, është ministri Abrashi dhe ministri Shala. Këta që unë së bashku me sekretarin e kemi kërkuar opinionin e zyrës ligjore të zyrës sime së kryeministrisë dhe zyra ligjore praktikisht thotë se në momentin që jepet betimi në Kuvend dhe fillon së ushtruari detyrën e deputetit, atëherë duhet të kemi një deklarim të ministrave se a dëshirojnë dhe më tutje ta mbajnë pozitën e ministrave në detyrë, sepse atë pozitë e kemi, apo dëshirojnë ta lejnë këtë pozitë të ministrave në detyrë dhe ta marrin pozitën e deputetit. Në këtë rast nuk flitet për shkarkim të ministrave, flitet vetëm për lirim nga detyra mbi bazën e ushtrimit të deputetit të Kuvendit të Republikës së Kosovës. Me dëshirë kisha me vazhdu me punu me të gjithë nga ju, derisa ta kishim dorëzu të gjithë së bashku detyrën kryeministrit të ri apo Qeverisë së re, por edhe më shumë dëshirë kam, që ne t’i zbatojmë të gjitha rregullat ligjore, e kushtetuese”, tha Mustafa, shkruan KP.

Ndërkaq, ministri në detyrë Arsim Bajrami tha se kjo është çështje kushtetuese dhe ligjore dhe se mbajtja e dy posteve, paraqet konflikt të interesit.

“Kjo është çështje kushtetues e ligjore. Një mundësi e mirë me ba riformatimin e Qeverisë për një kohë të shkurtë. Është një çështje kushtetuese. Unë mendoj që nga momenti i verifikimit të mandateve, mund të bëhet efektiv mandati i deputetëve dhe Kushtetuta jonë e parasheh si konflikt të interesave ushtrimin e dy funksioneve”, tha ai.