Në pjesën qendrore të Ugandës në fshatin Kambiri jeton Mariam Nabatanz, gruaja 39-vjeçe e cila mban rekordin botëror për faktin se ka më së shumti fëmijë. Ajo deri më sot ka sjellë në jetë 44 fëmijë, ku 38 prej tyre janë gjallë.

Katër shtatzënitë e para i kishte me binjakë, më pas tri shtatzënitë tjera me pesënjakë, dhe më pas tri shtatzëninë me trinjakë. Më pas ajo ka pasur sërish binjakë, kurse shtatzënitë tjera i ka pasur me nga një fëmijë, transmeton Telegrafi.

Të gjithë fëmijët i ka nga mosha pesë muajsh e deri në 23 vjeçar, dhe që të gjithë i ka lindur në rrugë natyrale. Shtatzëninë e parë e përjetoi pasi u martua si 13-vjeçe me burrin i cili asokohe ishte 43-vjeç.

Ajo ishte martuar e re, pasi që nëna i kishte vdekur kur ajo ishte e vogël dhe mbeti vetëm me babanë, i cili e martoi në rastin e parë që iu dha.

Që të gjithë fëmijët i ka me të njëjtin burrë, i cili pasi sollën në jetë fëmijën e fundit u zhduk pa gjurmë dhe e la të kujdeset vet për fëmijët.

Vite më parë ai vazhdimisht e keqtrajtonte, rrahte dhe i merrte gjithçka që kishte në shtëpi, transmeton telegrafi. Por, edhe pse disa herë është munduar të përdor mjete kontraceptive, të gjitha këto përpjekje ishin të kota dhe ajo prapë se prapë mbeste shtatzënë.

Mariam sot jeton me fëmijët e saj me të cilët ka arritur ta ndërtoj shtëpinë e re, dhe punon shumë që të mos ia shtrij dorën gjithkujt që të siguroj ushqimin dhe veshmbathjet për fëmijë.