Shqipëria mund të përballet me një situatë të vështirë hidroenergjetike këtë vit për shkak se reshjet e pakta kanë bërë që rezerva hidrike të bjerë në kuotat më të ulta të viteve të fundit.

Të dhënat zyrtare nga Enti Rregullator i Energjisë tregojnë se niveli i ujit në Liqenin e Fierzës ka rënë në 278 metra kur në të njëjtën kohë të vitit të kaluar kuota ishte 294 metra. Rënia me shpejtësi e rezervës e ka detyruar Korporatën elektroenergjetike të ulë prodhimin vendas. Si rezultat, prej këtij muaji Shqipëria ka nisur importet masive të energjisë.

Pak ditë më parë Operatori i Shpërndarjes bleu 8.5 milionë euro energji nga jashtë vetëm për të përballuar konsumin në muajin maj.

Burime nga OSHE thonë se deri në gusht kompania mund të shpenzojë 20 milionë euro për importin, çka mund ta detyrojë atë të ulë planin e investimeve. Sipas ekspertëve kjo do të kishte pasoja negative pasi shkurtimi i investimeve vë në rrezik planin për uljen e humbjeve.

Edhe pse treguesit financiarë të sektorit energjetik janë përmirësuar ndjeshëm dy vitet e fundit, Shqipëria mbetet sërish e varur nga kushtet atmosferike. Në buxhetin e këtij viti Qeveria ka parashikuar rreth 25 milionë euro si kontigjencë për sektorin energjetik, por nëse reshjet do të mungojnë edhe gjatë muajve në vijim, ashtu sikurse druhen ekspertët, kostot financiare për buxhetin mund të jenë më të mëdha.