Shifra milionëshe dhe shumë vetura e pasuri të paluajtshme janë deklaruar së fundi pranë Agjencisë Kundër Korrupsionit nga deputetë dhe zyrtarë të lartë shtetëror.

Edhe pse pasuria e tyre është rritur nga viti në vit mjaft shumë në mënyrë të pashpjegueshme vet prokurorët e pranojnë se po hezitojnë të nisin hetimet për kët raste.

Prokurori i shtetit, Shqipdon Fazliu, thotë se edhe pse ligji ekzistues për konfiskimin e pasurisë e precizon se pasuria mund të konfiskohet në rastet e aktgjykimit dënues sqaron se kjo nuk e pengon hetimin e personave që kanë mospërputhje në deklarimin e pasurisë.

“Nëse shohim se ka mospërputhje ne mund të autorizojmë policinë ose një prokuror në një rajon të caktuar nga vie personi dhe të fillojë grumbullimi i informatave dhe nëse del nga grumbullimi i informatave se ka qoftë shmangie nga tatimi, mashtrim apo çfarëdo vepre penale, është bazë mëse e mjaftueshme që të fillojnë hetimet edhe në këtë drejtim”, tha Fazliu për RTK.

Mospërputhje është gjetur edhe nga Agjencia Kundër Korrupsionit. Hasan Preteni tha se ata do të kontrollojnë 20% të zyrtarëve, për rrjedhjen e pasurisë.