Numri i ulët i aplikimeve nga shoqëria civile për anëtarë të Këshillit të Lartë te Gjyqësorit dhe Këshillit të Lartë të Prokurorisë në Shqipëri, detyroi dje Kuvendin të rihapë garën për kandidate te rinj, por kjo mund të sjellë shkelje të afateve kushtetuese, që është data 11 prill.

Drejtues të institucioneve të larta të gjyqësorit shprehin shqetësim për këtë situatë. Kryetari i Gjykatës Kushtetuese, Bashkim Dedja në një prononcim për Top Channel pohon se nëse afatet nuk zbatohen, patjetër që ato shkelen.

Gjithsesi duhen parë rrethanat, thotë ai, se ndoshta në momentin që janë hartuar këto probleme kushtetuese, nuk janë patur parasysh disa hapa, mekanizma ose afate që duhen respektuar.

“E kam thënë dhe e përsërish sërish, Kushtetuta është shkelur që në momentin e parë të saj me afate tepër të shkurtra 5-ditore që janë vënë në Kushtetutë. Kjo ka sjellë të tëra në vazhdimësi. Por e rëndësishme është që gjërat të bëhen, thotë Dedja.

Ndërsa për kryetarin e Gjykatës së Lartë, Xhezair Zaganjori, në këto kushte ka vetëm një zgjidhje, që organet aktuale të qëndrojnë përkohësisht në fuqi.

Mekanizmat respektive duhet të marrin një vendim. Nëqoftëse ka ngërç, sigurisht që shteti dhe institucionet duhet të funksionojnë. Kështu që duhet marrë një vendim, që mekanizmat ekzistues të funksionojnë, qoftë edhe me kompetenca të kufizuara, thotë Zaganjori.