Festivali Ndërkombëtar Fest Film Kosova “Hyjnesha në fron” do të hapet sot në mesditë në Amfiteatrin e hapur para Stacionit Hekurudhor në Fushë-Kosovë.

Paraprakisht, siç njoftoi organizatori, në orën 11 në hapësirat e Stacionit Hekurudhor të Fushë-Kosovës mbahet konferenca për media në të cilën do të prezantohen për filmat që do të shfaqen gjatë pesë ditëve të Festivalit dhe aktivitetet tjera në kuadër të Festivalit

Sivjet ‘krahas repertorit të pasur të filmave për të rritur, ‘Hyjnesha në fron’ sjell edhe edicionin e filmave për fëmijë. Dita e parë e Festivalit deri në orët e mbrëmjes i kushtohet 1 Qershorit, Ditës së Fëmijëve.

“Tridhjetë e pesë vjet në Kosovë nuk është xhiruar film për fëmijë. ‘Hyjnesha në fron’ organizon punëtorinë ‘Si bëhen filmat’ , punëtori kjo pjesë e së cilës do të jetë rixhirimi i skenës 27/1 së serialit dikur shumë të popullarizuar për fëmijë ‘Fidani’. Me këtë rast fëmijët në praktikë do të kenë rastin të mësojnë si punohen filmat”, ”, shpjegon Besim Ajeti, drejtori artistik i Festivalit.

Programi kulturor dhe argëtues për fëmijë fillon në orën 11 e 30 paradite me xhiron e ‘Trenit për fëmijë’ dhe parakalimin e bendit muzikor të KFOR-it. Në orën 13 e 45 shfaqet filmi i parë për fëmijë në ‘Kino Treni’.

Shfaqja e filmave për të rritur fillon po ashtu sot, në orën 16:00 dhe zgjat deri në orët e vona të mbrëmjes.

Krahas aktiviteteve argëtuese e kulturore gjatë gjithë kohës së zgjat Festivali ‘Hyjnesha në Fron”, në hapësirat e Stacionit Hekurudhor dhe në platonë para tij do të qëndrojnë hapur “Panairi për ushqim,veshje tradicionale e produkte tjera vendore’’.

Përderisa katër ditët e para të Festivalit do të mbahen në hapësirat e Stacionit Hekurudhor dhe në Amfiteatrin e Qytetit të Fushë Kosovës, nata përmbyllëse e “Hyjneshës në Fron’ do të mbahet në kështjellën e lashtë të fshatit Halilaq.

Në edicionin e sivjetmë të Festivalit Ndërkombëtar “Hyjnesha në fron”do të shfaqen 44 filma, të metrazhit të shkurtë, të mesëm e të gjatë nga 17 shtete të ndryshme të botës.