Anëtarësia e Aleancës Kosova e Re sot po zgjedh presidentin e ri të kësaj partie. Edhe një mandat do ta marrë Behgjet Pacolli, pasi është i vetmi kandidat për t’u rizgjedhur në krye të partisë që e themeloi dhe udhëhoqi deri më tani.

Anëtarësia e kësaj partie, edhe pse vlerësojnë se po të kishte më shumë kandidat për president të AKR-së gara do të ishte më interesante, Pacollin e shohin njeriun e duhur për ta udhëhequr atë.

Të shumtë në numër ishin votuesit e AKR-së në Hajvali, ku dega e pestë e kësaj partie që nga orët e hershme të mëngjesit kishte hapur vendvotimet.

Egzonë Vitija thotë se edhe vet Pacolli ka qenë pro kundërkandidatëve, porse vlerësojnë se ai duhet ta udhëheq partinë edhe për një mandat.

“Kandidatura ka qenë e hapur, mirëpo përveç presidentit që ka qenë Behgjet Pacolli…sikur të kishte sigurisht që do të ishte më interesante, sepse jemi parti liberale, mirëpo, nuk ka pasur të interesuar”, tha Vitija.

Ndërsa, kryetari i degës së pestë të AKR-së në Hajvali, Islam Pacolli e quan formë të re, zgjedhjen e presidentit të partisë një anëtar një votë.

“Fillimisht them që kjo është një formë e re e zgjedhjes për president të partisë dhe është demokratike. Hapja e votimeve është bërë qysh në mëngjes dhe është duke vazhduar. Interesim ka jashtëzakonisht të madh dhe është duke shkuar mjaftë mirë procesi”, theksoi Pacolli.

Ai shton se asnjëri nga zyrtarët e AKR-së nuk kanë dashur të dalin si kandidat për president të partisë. Pacolli thotë se kandidati i vetëm për të rimarrë edhe një mandat në krye të AKR-së, Behgjet Pacolli, ka qenë këmbëngulës që të ketë edhe tjerë kandidat, por megjithatë, të gjithë kanë vlerësuar që atë ta përkrahin dhe nuk kanë pranuar që të ketë kundër kandidat.

Ai shprehet i bindur se pas këtyre zgjedhjeve të brendshme, AKR do të dal fituese në zgjedhjet e ardhshme, pasi sipas tij, përkrahja për këtë parti po rritet çdo ditë.

“AKR ka një vit që po punon në mënyrë intensive dhe është duke punuar jashtëzakonisht në mënyrë të organizuar dhe ka mbështetje të madhe të qytetarëve, sikurse asnjëherë më parë dhe kam besim se do të jetë fituese”, ka shtuar ai.

Anëtarësia e kësaj partie në fletëvotime ka dy opsione, PO dhe JO, për të votuar për kandidatin e vetëm për president të AKR-së, Behgjet Pacolli.