Ligji për Klasifikimin e Informacioneve dhe Verifikimin e Sigurisë është në fazën e hartimit të tij dhe pritet të ketë ndryshime, sidomos në ato çështje të cilat janë ngritur si problem më herët.
Zyra Ligjore në Zyrën e Kryeministrit, ka bërë të ditur për “Arbresh.info” se Komisioni i themeluar nga qeveria tashmë ka nisur punën e tij në plotësimin dhe ndryshimin e këtij ligji.
“Me qëllim të përgatitjes së këtij Projektligji Qeveria e Republikës së Kosovës ka ndërmarr të gjitha veprimet e duhura në përputhje me Rregulloren e punës së Qeverisë, ku ka themeluar Komisionin për hartimin e Projektligjit për ndryshimin dhe plotësimin e Ligjit për Klasifikimin e Informacioneve dhe verifikimin e sigurisë. Projektligji është në fazën e hartimit dhe Komisioni gjatë hartimit të tij do ti trajtojë të gjitha çështjet e ngritura gjatë zbatimit të Ligjit për Klasifikimin e Informacioneve dhe verifikimin e sigurisë”, është shprehur Zyra Ligjore e kryeministrisë.
Ndërsa Agjencia Kosovare e Inteligjencën nuk ka kthyer ndonjë përgjigje rreth asaj se a është duke u bërë aktualisht verifikimi i zyrtarëve të lartë shtetëror, deri sa Departamenti për Verifikim të Sigurisë ndodhet ende në këtë institucion.
Mirëpo, as largimi i Departamentit për Verifikim të Sigurisë nga Agjencia Kosovare e Inteligjencës,dhe vendosja e tij në cilindo institucion,duket se nuk është zgjidhje. Ekspert të çështjeve të sigurisë kanë vlerësime të ndryshme sa i përket kësaj çështje. Anëtari i Komisionit për Punë të Brendshme dhe Siguri, Rexhep Selimi, pohon se problemet dhe mos respektimi i vendimeve të këtij departamenti rreth mos kalueshmërisë së testit të verifikimit do të vazhdojnë edhe pas bartjes së këtij departamenti në kryeministri.
Kjo sipas Selimit, për shkak se shteti i kapur ka arritur që ta përplas këtë ndikim të vetin kudo që është, andaj ky departament sipas tij, nëse kalon nga një institucion në institucion tjetër i bije vetëm të kaloj nëpër tentakuklat e këtij pushteti që e ka kapur shtetin.
“Ajo çfarëdo të duhej të ndodh tash është jo të ndërrohet vendi, por të respektohen të gjeturat e këtij departamenti, që ka të bëj me verifikimin e deritanishëm. Një ndër institucionet që nuk e kanë respektuar këtë vendim është Policia e Kosovës”, shprehet Selimi.
Ai, është skeptik sa i përket respektimit të vendimeve të këtij departamenti, edhe nëse i njëjti bartet në kryeministri, pasi sipas tij, nuk ndryshon asgjë nëse ky departament bartet nga një pistë në pistën tjetër.
Sipas tij, duhet të zbatohen fillimisht të gjeturat e këtij komisioni, të bëhen publike dhe të realizohen.
“Jo zyrtarisht ne dimë se të gjeturat e këtij institucioni sidomos kundrejt policisë janë tejet skandaloze. AKI e ka kryer punën e vet, por policia nuk po e zbaton. E kjo për shkak se shumë udhëheqës të tashëm të policisë, të cilët njëkohësisht janë të ndikuar politikisht kanë rezultuar që nuk e kanë kaluar verifikimin e sigurisë”, ka pohuar Selimi për “Arbresh.info”.
Por ndryshe nga anëtari i Komisionit për Punë të Brendshme dhe Siguri, mendon Skender Perteshi, nga Qendra Kosovare për Studime të Sigurisë.
Ai thotë se zhvendosja e Departamentit të Verifikimit të Sigurisë nga AKI, si agjenci e veçantë në kuadër të Qeverisë së Kosovës, është një iniciativë e mirë, e cila do të ndihmojë më shumë në pavarësimin e këtij institucioni.
“Largimi i këtij departamenti nga AKI, pritet të evitoj problemet e verifikimit të sigurisë me të cilin është përballur ky departament në tre vjetët e fundit, ku si shkak një pjesë e institucioneve të sigurisë nuk i ka zbatuar vendimet e këtij departamenti lidhur me verifikimin e sigurisë për zyrtarët publik që kishin qasje në nivele të ndryshme të informacioneve të klasifikuara”, ka pohuar Perteshi.
Respektimi i vendimeve të verifikimit të sigurisë të cilat dalin nga Departamenti i Verifikimit të AKI-së, sipas tij, janë obligative dhe duhen zbatuar menjëherë nga ana e institucioneve publike në Kosovë.
Por, problemi i verifikimit të sigurisë së deputetëve të Kuvendit të Kosovës, sipas Perteshit, pritet të bartet sërish, sepse Kuvendi i Kosovës, sipas tij, nuk pranon të verifikohet nga një institucion ekzekutiv, siç është Qeveria e Kosovës apo Departamenti i Verifikimit të Sigurisë.
Ai vlerëson se vendosja e departamentit të verifikimit të sigurisë në kryeministri mund të forcojë pozicionin e këtij institucioni dhe nuk mund të ndikohet më nga drejtori i AKI-së, apo mekanizma tjerë me ndikim.
Mirëpo sipas tij, para zhvendosjes së departamentit të verifikimi të AKI-së, në një institucion tjetër, duhet të bëhet një vlerësim i thukët profesional brenda stafit të verifikimit të AKI-së, si dhe të shikohen nevojat e reformimit të këtij institucioni, në mënyrë që të evitohen problemet që kanë ndodhur në të kaluarën me këtë institucion.
Por, njohësit e çështjeve të sigurisë pajtohen që ligji për Klasifikimin e Informacionit dhe Verifikimin e Sigurisë duhet të ndryshohet, pasi pa ndryshimin e këtij ligji nuk mund të zhvillohen hapat tutje për zhvendosjen e këtij departamenti nga AKI në kuadër të Qeverisë së Kosovës, dhe se kërkesat e këtij ligji janë pak të ekzagjeruar.
Ndryshe, me ardhjen e tij në krye të AKI-së, Agron Selimaj pati kërkuar që ky departament të nxirret nga AKI-ja dhe të funksionojë në kuadër të qeverisë.
/Gita Lushi/ Arbresh.info
Barella: Sot kundër një skuadre shumë të fortë dëshmuam se m...
Kurti: Të përkushtuar për të vërtetën dhe për drejtësi për t...
Shpërthimet në Liban, reagon kryeministri izraelit Netanyahu
Raportohet për një lëvizje të mundshme të Zhegrovës në të ar...
Biden pret të hënën homologun e Emirateve të Bashkuara Arabe...
Finlanda e mbron vendimin për të blerë armë izraelite