Për Universitetin “Ukshin Hoti” në Prizren, fillimi i vitit akademik 2016/2017 është vit i veçantë ngase nisë punën Fakulteti i Shkencave të Jetës dhe Mjedisit, një fakultet i ri.

Në një njoftim për media thuhet se Rektori Ramë Vataj i shoqëruar me bashkëpunëtorë, mori pjesë në ceremoninë e pritjes së studentëve të rinj në këtë fakultet ku theksoi se si rektor e ka marr iniciativën për themelimin e këtij fakulteti, për të ofruar mundësi studimi në fusha që ka interes vendi dhe ku studentët pas përfundimit të studimeve mund të inkuadrohen më lehtë në tregun e punës.

Ai u uroi studentëve e stafit të UPZ fillimin e vitit të ri akademik.

“Në këtë ditë të veçantë posaçërisht uroj studentët e rijnë që për herë të parë i  bashkohen botës akademike. Ju inkurajoj që të përkushtoheni në mësime që në fillim të studimeve dhe kam besim të plotë se do të tregoni suksese dhe do të formoheni si kuadro që do t’i shërbeni vendit dhe familjes tuaj. Universiteti “Ukshin Hoti” në Prizren, studentët e rinj sivjet i pret me kushte më të mira në të gjitha aspektet si parakusht për zhvillimin normal të procesit mësimor por edhe në ngritjen e cilësisë, për të cilën gjë jemi duke punuar në vazhdimësi.”, theksoi Rektori Vataj me këtë rast.