Shtatë çmime dhe statueta të “Hyjneshës në fron” nga Dardania antike do të ndahen sonte për filmat më të mirë në festival.

Statuetat e Hyjneshës në fron, origjinalet e së cilës datojnë nga parahistoria, më se pesëmijë vjet të vjetra vijnë me shkëlqimin bashkëkohor dhe me vlerat e rinovuara për arritje kinematografike, të cilat organizatori do t’i theksojë të dielën.

Sipas organizatorëve të festivalit të filmit, Hn’F, për filmin më të mirë të festivalit Hn’F do të konkurrojnë rreth dyzet produksione kinematografike nga tri kontinente, filma nga vendet e zhvilluara industriale por edhe filma nga vende të vogla e prodhime të pavarura.

“Pjesë e festës përmbyllëse është edhe koncerti rock bendit të popullarizuar kosovar “Jericho” që do të shfaqet drejtpërdrejt në amfiteatrin e stacionit, menjëherë pas ndarjes së çmimeve. Në koncert do të performojë DJ Nardi Zeqiraj, gjithashtu”, thuhet në njoftim.

Ceremonia festive do të mbahet në amfiteatrin e stacionit të trenave në Fushë Kosovë.