Enkelena Gjuka, kosovarja e doktoruar në avokaturë, si studente e nderit në St. John’s University School of Law në New York, ka hulumtuar për një vit dhe e ka shkruar një shkrim, se si të rritet numri i femrave në bordet e korporatave amerikane.

Hulumtimin që Gjuka e ka bërë gjatë studimeve është përzgjedhur që të botohet në vitin 2014 dhe tani është bërë pjesë e “Journal of Civil Rights and Economic Development”, një zhurnal që është themeluar në vitin 1986.

Studentja me prejardhje nga Peja, e ka marrë për bazë numrin e vogël të femrave në bordet e korporatave, si dhe mundësinë se si të rritet ky numër, pos tjerash, duke e avancuar dhe shtytur femrën që të synojë pozita më të larta.

Në punimin prej 30-faqesh, ajo ka shkruar se sipas hulumtimeve, bordet me balancë më të mirë të gjinisë i sjellin kompanisë funksion më të rregullt dhe të ardhura më të mëdha.

“Unë besoj që rritja e femrave ne borde të korporatave mund të bëhet vetëm me përkrahjen e shtetit, ndihmën e kongresit, dhe inkuadrimin e programeve te ndryshme nga vet korporatat. Përndryshe, lufta për rritjen e numrit të femrave në pozita udhëheqëse do të vazhdon të jetë e gjatë dhe e vështirë”.

Ndryshe, Gjuka tani jeton në New York dhe është avokate e licencuar që punon në ‘The Carlyle Group’, një nga tri firmat më prestigjioze në botë, që menaxhon me një buxhet prej 200 miliard dollarë.