Të dua, Baltë shqiptare!
Të dua:
egërsisht!
dëshpërimisht!
Si ujku pyllin,
si vala valën,
si balta baltën!
Se gjer mbi gju
jam brenda teje;
se lerë kam
këtu:
si Baba
e Gjyshi.
Të dua, Baltë shqiptare!
se gjer mi bel
e përmbi bel
jam brenda teje –
e s’dal dot,
se s’dua!
Se ti më lidh
e më mban:
Me mjaltë
e me pelin!
Se vdekur ka,
këtu,
dhe Nëna,
dhe Baba,
e Gjysh – stërgjyshi!
Të dua, Baltë shqiptare,
magjistare,
e ëmbël
si vetë vdekja!
Se thellë jam këtu,
brenda teje:
gjer mi gju,
gjer më bel
e gjer mi krye.
Dhe dua fort të dehem
të prehem,
(Ah, që tani! )
brenda teje
Të të pushtoj
i dëshpëruar;
Të të shtrëngoj,
të më shtrëngosh:
egërsisht!
dëshpërimisht!
e të më tretësh
si gjysh – stërgjysh
e si po tret
ah! zemërmadh
e flokë – bardhë
e trup – zhuriturin
Babanë!
Të dua, Baltë shqiptare,
magjistare:
ti mjaltë e ëmbël, –
pelin e hidhur.
Të dua:
egërsisht,
dëshpërimisht,
si ujku pyllin,
si vala valën
si balta baltën!
“Edi, eja dashuria ime” – Gjesti me kunja ndaj Xhenetës
Fonseca insiston se Milani mund ta fitojë titullin kampion p...
Palestinezët e konsiderojnë moment historik urdhër arrestin ...
“Ose do bëhet multiplanetare, ose do zhduket”, paralajmërimi...
Çka i shkakton dhimbjet e kokës në mëngjes?
A Kane karbohidrate kartotat dhe barishtet jeshile?
Skip to content
